La Xunta anicia la tramitación de la Llei de Memoria Democrática

|
Gaspar Llamazares y Concha Masa

La Proposición de Llei de Recuperación de la Memoria Democrática, presentada por IX, foi almitida a trámite na Xunta Xeneral col sofitu de la FSA, Podemos y Ciudadanos, y la oposición del PP y Foro. “Debémosla a munchos ciudadanos que llucharon contra la dictadura y polos derechos democráticos”, afirmó Llamazares.

El voceru de la coalición apuntó que l’aniciu del alderique supón resarcir estos ciudadanos, asina como xusticia pa les víctimes, la memoria y la reparación. La iniciativa sigue la llinia d’otros testos llexislativos en tramitación, como’l de la Comunitat Valenciana o Extremadura, y otreo yá aprobaos, como’l de Catalunya o Andalucía, pa complementar la llei estatal de Memoria Histórica, “paralizada dende la llegada al Gobiernu del PP”.

N’Asturias, según reconoció Gaspar Llamazares, la llei tien un territoriu fértil al haber un mapa de foses, con una actualización en trámite; una propuesta de retirada de símbolos; un catálogu de restos y dixitalización d’archivos; y la promoción de la investigación en la Universidad, instrumentos “que paga la pena integralos y ellevar el rangu llegal pa protexer los derechos de les víctimes y la so memoria”.

Ente los aspeutos que recueye la proposición de llei d’Izquierda Xunida (IX) destaca la ellaboración d’un censu de víctimes, non sólo asesinaos y desapaecíos, sinón tamién cualquier persona que sufrió represión, l’esiliu, la deportación, los reprimíos por orientación sexual o’l robu de críos; la constitución d’entidaes como l’Institutu Asturianu de la Memoria Democrática, pal estudiu, investigación y impulsu de les midíes establecíes nesta llei, y el Conseyu de la Memoria Democrática, como espaciu de coordinación col movimientu memorialista asturianu; o la inclusión de la Memoria Democrática nel currículu de Secundaria y Bachilleratu, ente otros.

Contador Estadistiques