La Xunta alvierte que nun ye almisible una oficialidá diferida

La Xunta pola Defensa de la Llingua retruca les declaraciones de "de responsables políticos asturianos" nes que s'abre la posibilidá d'aceptar un oficialidá diferida na próxima reforma del estatutu.

La Xunta ta acabante de facer públicu un comunicáu de prensa onde afita la so postura en rellación a un posible propuesta d'una oficialidá diferida. D'esta manera la organización de revindicación llingüística retruca principalmente -ente otres- les declaraciones de la diputada d'Izquierda Xunida Noemí Martín, qu'afirmaba nuna entrevista nún periódicu asturianu que "hai fórmules que pueden permitir la oficialidá diferida. Nel so momentu discutióse una posibilidá: qu' una mayoría de trés quintos de la Xunta pudiera aprobar nún momentu determináu la oficialidá".

La Xunta quier aclara de mano que les "palabres d'aquellos que s'amuesen partidarios de la protección del asturianu pero contrarios a la so oficialidá, namás escuenden consecuencies abiertamente negatives pa cola llingua asturiana". Centrándose na cuestión de la oficialidá diferida la Xunta pola Defensa de la Llingua asegura "nun son aceptables les maniobres dilatories como la llamada oficialidá diferida, qu'amás de nun tener base llegal nenguna, ye otra forma de "non oficialidá", y que l'aprobación de la mesma supondría "caltener esta situación de discriminación indefinidamente, aplazar un problema que tien de solucionase darréu y eludir la responsabilidá que los nuesos políticos han asumir". Asina la Xunta llega a la conlusión de que "la única manera de protexer realmente'l patrimoniu llingüísticu asturianu ye'l reconocimientu espresu del asturianu como llingua oficial nel testu del Estatutu d'Autonomía, porque esi y namás esi ye'l tratamientu que la Constitución Española prevé pa les llingües del Estáu".

Otra manera, nos actos del día d'Asturies de la coalición IX-BPA l'asturianu foi una tema que tuvo presente nos discursos. Asina'l coordinador xeneral d'IX n'Asturies calificó la oficialidá del asturianu como daqué irrenunciable na próxima reforma. De la mesma manera Gaspar Llamazares defendió un estatutu nuevu p'Asturies que fuera "respetuosu cola llingua" y con otros derechos y demandes asturianes. Pel so llau, Rafael Palacios en representación del Bloque por Asturies aseguró que Bloque por Asturies "nun va volver a integrase en denguna coalición de gobiernu que nun garantice la oficialidá de la llingua asturiana y del gallego-asturianu nel so territoriu.