La xueza refuga’l sobreseimientu de la causa pol arramáu d’Aboño pidida por Fiscalía y va siguir investigando

La investigación del arramáu d’Aboño asocedíu’l 26 de xunu va continuar pese a la postura de la Fiscalía, que pidía’l sobreseimientu de la causa. Grupos ambientales qu’exercen l’acusación popular celebren la decisión de la xueza.

El mes pasáu conocíase la decisión del fiscal de Mediu Ambiente de solicitar a la maxistrada del Xulgáu de lo Penal númberu 1 de Xixón el sobreseimientu del archivu de les dilixencies entamaes pol arramáu a la ría d’Aboño dende la central térmica d’HCEnergía, provocando la llegada de galipote a delles sableres de la zona, al entender que nun había responsabilidá penal por parte de la empresa. Sicasí, la xueza descarta agora esti pidimientu al entender necesario siguir investigando pa esclariar los fecho, pa lo que solicita información nueva al Gobiernu y a HCEnergía.

La Coordinadora Ecoloxista d’Asturies, l’Asociación para la Defensa Jurídica del Medio Ambiente-ULEX, el Colectivo Ecologista de Avilés, la Plataforma por la Defensa de la Cordillera Cantábrica, l’Asociación para la Conservación y Estudio del Lobo (ASCEL), el Grupu d’Ornitoloxia Mavea d'Avilés, Ixuxu y l’Asociación Verdes Asturianos, grupos ambientales qu’exercen l’acusación popular, entienden qu’hubo “dos neglixencies gravísimes” el día de los fechos. La primer d’elles ye la rotura d’una válvula pola que se produció la fuga de fuel, a la que siguió darréu la de l’arqueta de contención, que provocó la perpetración del delitu imputáu con resultáu de “una de les agresiones mayores al nuesu patrimoniu natural en forma d’una mancha tóxica que s’estendió dende la ría al mar a más d’un quilómetru de la costa implicando la execución del Plan Territorial de Continxencia por Contaminación Marina Accidental por parte del Gobiernu”, lo que nun quita que tovía se pueda puede ver “la buelga de la contaminación nos pedreros de la zona de Carreño”.

Estos grupos ambientales entienden qu’HCEnergía tien conocimientu del riesgo de la so industria y apunten qu’incumplió al menos dos de les condiciones necesaries pa recibir l’autorización ambiental que-y permite desendolcar la so actividá. “Esperamos que procedimientos como l’aniciáu sirvan pa qu’empreses como la imputada dexen de resalvar toda midida de precaución, evitando’l mantenimientu y vixilancia del estáu de  les sos instalaciones”, afirmen.