La XPDLLA espuso les sos reivindicaciones principales a la conseyera d’Educación

Carlos Pulgar, voceru de la Xunta pola Defensa de la Llingua Asturiana (XPDLLA), caltuvo una reunión esti martes con Ana Isabel Álvarez González, conseyera d’Educación y Universidaes. Nella, espuso les reivindaciones del coleutivu na materia.
 
“Munches d’estes reivindicaciones son desgraciadamente históriques porque lleven muncho tiempu ensin cumplise”, señaló Pulgar tres l’aconceyamientu d’una hora de llargor nel que faló a la conseyera “de los diferentes niveles educativos y cómo taba l’asturianu en caún d’ellos y cómo queremos que tea, de la situación de los docentes y del propiu usu alministrativu del asturianu”. Una reunión na qu’Álvarez González amosó receptividá pa la recopilación d’esta información relativa a los derechos llingüísticos nel so campu d'actuación, anque nun adquirió compromisos.
 
No que correspuende a los niveles educativos, el voceru de la XPDLLA comentó-y a la conseyera que Primaria ye la etapa onde meyor ta nestos momentos l’asturianu pese a la so precariedá y reclamó que “se xeneralizase la ufierta a tolos centros, públicos, privaos y concertaos, porque nestos momentos hai una diferencia mui grande ente la de los públicos y los restantes”. “Esiximos qu’hai que tar mui vixilante pa qu’en tolos centros se realiza esa ufierta y que se faiga alcordies de la sentencia de finales del añu pasáu qu’anulaba la ratio”, añadió Pulgar, que señala que ye competencia d’Educación “l’avisar a los colexos de qu’ahí qu’acatar esa sentencia y que nun se pue utilizar esa disculpa como una táutica pa impedir la llibre eleición de la asignatura por parte de los escolinos”.
 
Respeuto a Infantil, Secundaria y Bachilleratu, Pulgar recordó que les trés tán nuna situación paecía. Sobre Infantil, comentó qu’hai un vacíu llegal qu’impide a los alumnos que tengan como llingua materna l’asturianu consolidar los sos conocimientos “nuna etapa perimportante pa la so formación”. Pela so parte, na ESO “l’asignatura de Llingua Asturiana ufiértase malinterpretando la Llei d’Usu y en competencia con otra serie d’asignatures”, lo qu’obliga a escoyer al escolín ente l’asturianu y otres materies, dalgo que se repite en Bachiller. “Lo mínimo esixible ye que l’asturianu tuviera les condiciones que tien en Primaria”, reclama’l voceru de la XPDLLA.
 
Tamién se faló de la situación de la Formación Profesional, “otru nivel formativu nel que nun hai nengún módulu de llingua asturiana nestos momentos. Pedimos que s’introduza dientro de les diferentes salides profesionales los módulos d’asturianu adaptaos a los estudios de la FP”, reclamó. L’últimu tema a tratar foi’l de la Universidá, onde la organización cívica resaltó la demanda esistente pa “la creación d’una titulación de grau nueva pal asturianu”.
 
Cambios nes especialidaes de docentes
 
El siguiente tema que sacó a colación Pulgar foi’l de la situación de los docentes. Asina, esplicó a Álvarez González que “nun esisten les especialidaes d’asturianu, nin nel cuerpu de maestros nin nel de profesores de Secundaria, y, evidentemente, reclamamos que s’anicien les negociaciones con tolos sectores implicaos pa que se creen eses especialidaes y se cubran les plantiyes de los centros”. “Nesti aspetutu de la especialidá, la conseyera aludió un poquitín a que cola reordenación nueva de la Universidá van cambiar les cuestiones. Asina, nun va haber tanta especialidá de los maestros: van ser namái dos, Primaria y Infantil, y que dientro d’eses dos especialidaes habría dellos itinerarios, uno d’ellos, evidentemente, d’asturianu”, comentó Pulgar, qu’añadió que la XPDLLA “va siguir esixendo que los maestros d’asturianu tenga esactamente les mesmes condiciones, los mesmos requisitos que’l resto de maestros d’otres especialidaes o itinerarios”. Sobre l’usu vehicular de la llingua, l’asociación de defensa del idioma destacó que “ye un bon momentu pa dir entamando esperiencies d’usu vehicular de la llingua en toles etapes y en diferentes materies”. 
 
Respeuto al ámbitu alministrativu, Pulgar fixo una referencia especial a la necesidá de reforzar la figura d’un coordinador d’apoyu didáuticu, qu’esistió nos años anteriores, amás de la de contar con un serviciu de normalización y coordinación y apoyo didáuticu “que tuviera les funciones d’asesorar a tolos implicaos no relativo a les regulaciones normatives y que s’encargara d’impulsar y de facer siguimientu de l’asignatura en tolos centros y tolos niveles, amás de normalizar la utilización del asturianu dientro de la propia alministración educativa”.
 
Pela so parte, Álvarez González aludió al representante de la XPDLLA de que taba nun periodu de recopilación d’información sobre l’asuntu pa conocer la situación real de la enseñanza del asturianu. “Nun hubo compromisos concretos, pero sí que demostraba un ciertu conocimientu sobre ciertes cuestiones como la esistencia de táutiques por parte de dalgunos centros pa intentar nun ufiertar l’asignatura”, destacó Pulgar. La conseyera, amás, comunicó que pese a que nel organigrama d’Educación y Universidaes espublizáu’l sábadu nel BOPA nun apaecía nengún cargu relacionáu col asturianu, sí dixo que diba a haber dalgún tipu de coordinador que tutele un poquitín tol procesu d’implantación y siguimientu de les matrícules y tolo que solía facer el coordinador d’apoyu didáuticu.