La xota y la tradición de les alfombres florales entren nel Censu del Patrimoniu Cultural Inmaterial d'Asturies

Ésti tien la mira de reflexar y identificar les manifestaciones culturales inmateriales del país, rexistrando los sos datos básicos.

El Boletín Oficial del Principáu d'Asturies (BOPA) de güei espubliza dos resoluciones de la Conseyería de Presidencia, Retu Demográficu, Igualdá y Turismu, de la que depende Cultura, poles que s'inclúin la xota y les alfombres florales al Censu del Patrimoniu Cultural Inmaterial d'Asturies. Asina, nel mesmu créase una ficha na que se documenta la manifestación colos sos elementos principales y detalles sobre'l suxetu o coleutivu protagonista, la so evolución, simbolismos o riesgos.

Nel casu de la xota, preséntase como "un baille de pareyes enfrentaes, de ritmu tranquilu o posáu, con subdivisión ternaria, y nel que suel tar presente l'asina nomáu 'pasu de xota'". La so práutica recuéyela na "práutica totalidá del territoriu asturianu", con "una serie de variantes y de particularidaes específiques, que foron camudando a lo llargo del tiempo", y señala como los sos portadores a "les persones que la baillen", de cualquier edá.

Na tradición de les alfombres florales apúntase que se da en dellos puntos del país, "rescampando dos: Castropol (Castropol) y Cué (Llanes)". Esplícase que se celebren principalmente venceyada a la celebración el Corpus Christi, anque nel casu de la población llanisca dase na festividá llocal de La Sacramental, y conclúise que "la tresmisión interxeneracional de la tradición de les alfombres florales y los conocimientos asociaos a las mesmes contribúi a minimizar los riesgos del so desaniciu, preservando esta manifestación nes comunidaes portadores".