La XII Asamblea d'IX pide la dimisión de Ribera

La única llista presentada algamó'l sofitu del más del 61 por cientu de los delegaos acreitaos. El sector críticu nun participó por impugnar el procesu énte la direición federal.

El Centru Municipal Integráu Pumarín-Xixón Sur acoyó'l vienres y el sábadu la XII Asamblea d'Izquierda Xunida (IX). Nella escoyóse la so coordinadora por 183 votos a favor, nengún en contra y 9 astenciones, con 297 acreitaos, númberos mui asemeyaos (191 votos a favor, nengún en contra y 8 astenciones) colos que s'aprobó la de la Comisión de Garantía.

Namái se presentó una candidatura, encabezada pol actual coordinador en funciones, Alejandro Suárez, de la que formaben parte, ente otros, los diputaos Ángela Vallina y Ovidio Zapico, asina como los alcaldes y les alcaldeses de la formación. Esta situación diose pola negativa del sector críticu de presentar llista, impugnando l'asamblea pol procedimientu: votu de delegaos en llugar de primaries abiertes.

"La direición nueva tien que trabayar pa normalizar los conflictos, pa canalizalos de manera positiva. Y eso ye lo que vamos facer. Yo toi mui satisfechu del resultado de la votación, col desarrollu de los trabayos de l'Asamblea y nun creo que los problemes nun tengan solución", esplicó Suárez. "La direición yá piensa y tien nidio que n'Asturies necesítase y requierse un Gobiernu tripartitu d'izquierda y vamos lluchar por él per tola llexislatura, en consonancia col Gobiernu español", añadió.

L'Asamblea tamién aprobó, por unanimidá, reprobar a la ministra pa la Transición Ecolóxica y pal Retu Demográficu, Teresa Ribera, y pidir la so dimisión, y va presentar una iniciativa parllamentaria na Xunta Xeneral pa instar al Gobiernu a que se dirixa a Pedro Sánchez nel mesmu sentíu. La razón son "les midíes adoptaes pola ministra de manera prematura, adelantándose a los tiempos esixíos pola Xunión Europea", a lo que se suma agora "un anunciu nuevu que pue afeutar a empreses asturianes en materia de coxeneración".