La xestora de Fernández noma a Álvarez Areces voceru del PSOE nel Senáu

|
Vicente Álvarez Areces

L’ex presidente d’Asturies, Vicente Álvarez Areces, ye’l voceru nuevu del PSOE nel Senáu en sustitución d’Óscar López, según anunció esti llunes el voceru de la xestora dirixida por Javier Fernández, Mario Jiménez. Tamién hai cambiu nel Parllamentu Européu.

Na rueda de prensa en Madrid nel que se dio anuncia a estes modificaciones, una periodista entrugó a Jiménez pola compatibilidá de Fernández como presidente d’Asturies y de la xestora depués d’unes crítiques de Pablo Iglesias. “Énte esta situación faigo una llamada al respetu del secretariu xeneral del partíu Podemos pa que sía respetuosu col partíu socialista y lo sos procesos internos y normes”, apuntó pa depués calificar de “obscenidá” y de “intolerable” la postura d’Iglesias y de “dalgunos dirixentes” de la formación morada. “Ye una estratexa burda d’aprovechamientu que nun lu va llevar a nenguna parte”, siguó pa darréu acusalu de “volar tolos pontes d’entendimientu de la izquierda española” y “facilitar cola so estratexa de ruptura qu’esti país nun tuviere un Gobiernu diferente hai munchos meses. Foi una decisión personal y calculada”.

Estratexa de Podemos “cola derecha asturiana”

No que respeuta a la compatibilidá de cargos de Fernández, el voceru de la xestora acusó a Podemos Asturies de “dar caldu gordu a la derecha”, apuntando que la formación asturiana “demuestra incapacidá y cierto complexu”. “Nun terminen de comprender que la fortaleza y el lideralgu qu’amuesa Fernández permite-y ser un magníficu presidente d’Asturies y un bon presidente de la comisión xestora”, afirmó pa finar la so respuesta afalando a Podemos a “abandondar esa forma de facer política del too val”.

Contador Estadistiques