'La xente amuesa abondo interés poles llingües que nun conocen', coméntanos Carlos Díaz dende Ljouwert

Carlos Díaz, miembru del grupu folk Xera y un de los organizadores de la Selmana d'Asturies en Frisia, cuéntanos como foi esta esperiencia dientro de programación de la capitalidá europea de la cultura.

-¿Cómo se ta recibiendo en Ljouwert esta selmana dedicada a la llingua asturiana?

Asturies resultara una grata sorpresa tantu pal público asistente como pa numerosos llingüistas cuya conocencia de la rialidá hestórica de la llingüa astur-llionesa xuntose cola presencia aún viva d’una parte d’esta na península: la llingua asturiana.

La xente amuesa abondo interés poles llingües que nun conocen. Amás, concretamente los frisios amuesen tamién dicho interés, ya que vense reflexáos como falantes d’una llingua minorizada, del mesmu modu.

-¿Cómo se xestó esti espaciu dedicáu a la nuesa llingua dientro de la programación de la capitalidá europea de la cultura?

El proyeutu orixinal del desendolque d’un espaciu pa les llingües minorizaes europees na capitalidá europea, foi llevau p’alantre por la fundación Afûk que pertenez al proyeutu de Lân fan Taal (tierra de llingües) impulsáu pola Xunión Europea.

Al algamar el segundu puestu nel festival de llingües minorizaes “Liet international”, ficiéramo-nos conocíos en Frisia. Al instalanos equí, participáramos en delles actividaes algamando el nome de “los músicos d’asturies”. Fuera ya durante la seronda pasada cuando plantegara Afûk la posibilidá de facer la selmana asturiana. D’aquella organizárase una campaña de les 10 pallabres más prestoses n’asturianu. Dempués d’ello “Iniciativa pol asturianu” incorporaríase al proyeutu de la selmana asturiana.

Sedría entós cuando entamaría una ronda de contáutos pa apurrir la mayor participación posible, algamando como collaboraores a la fundación Belenos (Alberto Álvarez Peña y Daniel Cueli), la Banda de Gaites la Raitana (Jordi Fernández), la empresa musicasturiana.com (Xicu Ariza), la Academia de la Llingua Asturiana, la Dirección Xeneral de Política Llingüística del Principáu d'Asturies y la Oficina de Turismu del Principáu d'Asturies.

-¿Por qué ye importante tener esta presencia nun eventu d'esti calter?

Pa concienciar de que la llingua asturiana ye un patrimoniu merecedor nun solo del calter oficial que aún nun tien, sinon de un sitiu nel estudiu reglau dientru del fenómenu lligüísticu na península ibérica.