La XDLA zarra la revisión del Llibru Blancu con un alderique sobre la recuperación del idioma

‘Recuperación y normalización llingüística d'Asturies’ ye’l títulu de la mesa-taller cabera de les xornaes entamaes pola XDLA pa la revisión y actualización del Llibru Blancu nel so 15 aniversariu. L’alderique va celebrase esti miércoles n’Uviéu.
 
Tres falar de la situación del asturianu na educación, la presencia del idioma nos medios de comunicació y los problemes qu’atopen los servicios de normalización llingüística, agora llega’l turnu de revisar cómo ta’l procesu de recuperación y normalización llingüística nel país. Pa ello, la Xunta pola Defensa de la Llingua Asturiana (XDLA) convida al profesor Ramón d’Andrés y al filólogu David Guardado, que darán el so puntu de vista xunto col voceru de la organización de defensa del idioma, Carlos Pulgar. Mentes, Llucía Menéndez encargaráse de la moderación del alderique.
 
Con esta charra, que va dar entamu a les 18 hores nel salón d'actos del Departamentu de Filoloxía Española de la Universidá d'Uviéu, la XDLA zarra esti ciclu nomáu ’15 años del Llibru Blancu: revisión y actualización de la política llingüística’ col que la organización buscaba “analizar cuála ye la situación cuando entama la segunda década del sieglu XXI; qué s’avanzó nos quince años que colaron y, sobre manera, cómo pue ayudanos una reflexón nueva p’actualizar les estratexes y les propuestes que dende un movimientu de reivindicación llingüística han facese pa encarar con fuerces anovaes un futuru inciertu pa la llingua”.