La XDLA y la Estaya de la Llingua d’Avilés entamen cursos d’asturianu

Esti abril van principiar dos cursos d’asturianu. El primeru, entamáu pola XDLA, ta destináu a persones con conocimientos previos del idioma y tien como sede Uviéu, mientres que’l segundu ye d'aniciación y celébrase en Llaranes.

El Cursu Avanzáu d’Asturianu de la Xunta pola Defensa de la Llingua Asturiana (XDLA) va principiar el martes y va tener una duración de 40 hores dividíes en clases de 120 minutos (martes y xueves, de 19 a 21 hores) que van ponese nel llocal Conceyu Abiertu (La Gascona 12, baxu). La matrícula, qu’inclúi tolos materiales, tien un coste de 20 euros pa socios y de 30, pa no socios. Ésta pue tramitase al traviés del corréu uvieu@exunta.org o del teléfonu  679.650.998, medios per onde tamién ye posible solicitar información. Hai que destacar que la XDLA ye una entidá acreitada pola Conseyería d'Educación, Cultura y Deporte pa la formación permanente del profesoráu.

Pela so parte, el qu’entama la Estaya de la Llingua d’Avilés ta destináu a persones mayores de 16 años ensin conocimientos d’asturianu o con un nivel baxu. Ésti , de 30 hores de llargor, va desenvolvese del 24 d’abril al 17 de xunu nel Aula Didáutica de Cultura Popular Asturiana, asitiada en Llaranes, los martes y xueves de 19 a 21 hores, y tien carauter gratuitu. El plazu d’inscripción fina’l 16 d’abril y la matrícula ha de formalizase al traviés del corréu eléctronicu estayallingua@ayto-aviles.es, del teléfonu 985.54.55.08 o de manera presencial na oficina del SNL na Casa la Cultura. Los participantes qu’acudan al 90 por cientu de les clases van recibir un diploma acreitativu.