La XDLA ve “lluces y solombres” na cobertoria de la RTPA a la Selmana de les Lletres Asturianes

|
El ‘Protocolu pa la visibilidá de la Selmana de les Lletres en RTPA’, qu’unvió la XDLA a Política Llingüística y la direición del ente, cumplióse a medies. La organización ve “lluces y solombres” na cobertoria de los actos de la Selmana.
 
“Pudieron vese pasos alantre bien claros, pero tamién desdexamientu en dellos puntos”, señaló la Xunta pola Defensa de la Lllinga Asturiana (XDLA), que redautó n’abril diez propuestes qu’ayudaríen “a visibilizar les actividaes y la llingua propia na emisora”, amosando asina un compromisu d’ésta pa col idioma, como marca la llei. Ún de los avances más importantes que se dieron esti añu foi la presencia de los actos de la Selmana de les Lletres en ‘TPA Noticias’, “con noticies sobre les actividaes entamaes pol Gobiernu, conexones en directo cola Xunta Estraordinaria de l’Academia de la Llingua Asturiana y reportaxes sobre la situación del idioma en tolos espacios informativos de la cadena. Mesmamente, pela primer vez na historia, ‘TPA Noticias’ usó la nuestra llingua nos informativos, un importante pasu alantre que mostró qu’hai profesionales preparaos y que nun habría nengún problema n’echar a andar un informativu n’asturianu. Quedó claro que’l problema principal ye de la dirección de RTPA”. Nesi sen, apunten que’l primer día los trabayadores fixeron la entradina de la noticia n’asturianu, camudando pal restu de xornaes la introducción de la mesma al castellanu, “dalgo que muestra que nun ye que nun puedan, sinón que nun-yos dexen informar n’asturianu”. Por último, el coleutivu cívicu nun quedó conforme cola prioridá dada a les informaciones.
 
Un pasu atrás foi la non retresmisión d’actos, como l’institucional de llectura de testos n’asturianu por parte de parllamentarios de la Xunta Xeneral o la Xunta Estraordinaria de l’ALLA, dalgo que sí se fixera años atrás. Tampoco nun hebo nengún especial de ‘Sones’ o ‘Pieces’, nin s’emitió nenguna película d’animación de personaxes de cómic o manga, teniendo en cuenta que la Selmana taba dedicada esti añu a les histories gráfiques. Por contra, sí se programó otra vuelta ‘El rostru impenetrable (One-eyed Jacks)’ y delles producciones como ‘Cinco poemes’ o ‘Diez autores, diez llugares’, amás de llevar a les nueses pantalles el musical de Nacho Fonseca ‘Nora, Mauro y los suaños’.
 

La utilización dende’l llunes del testu ‘Selmana de les Lletres Asturianes’ xunto a la mosca de la cadena ayudó a visibilizar la celebración, anque la XDLA echó en falta que los demás espacios de RTPA, yá sían d’actualidá o d’entretenimientu, “sirvieran de ferramientes pa la visibilidá de la industria cultural n’asturianu, entrevistando a xente de la lliteratura y la música n’asturianu”. No que respeuta a la RPA, el coleutivu cívicu solicitaba una presencia mayor de música n’asturianu a lo llargos d’esos díes, dalgo que nun se fixo pese a los avances que ta dando l’idioma na parrilla de la radio pública.

 
Contador Estadistiques