La XDLA va empezar una campaña de reclamaciones alministratives pa facer cumplir la toponimia oficial

Tres 8 años d’incumplimientu sistemáticu de los decretos toponímicos por parte de l’Alministración, la XDLA tien previsto esplorar víes alministratives o xudiciales pa facer cumplir la llexislación. Denuncia la paralización del de Santu Adrianu.

Según esplica la Xunta pola Defensa de la Llingua Asturiana (XDLA) nun comunicáu, mientres l’añu y mediu de Gobiernu del PSOE nun s’aprobó nengún decretu toponímicu nuevu pese a qu’hai dalgunos mui avanzaos. Ente ellos ta’l casu de particular de Santu Adrianu, que yá hai años que pasó tolos trámites alministrativos, faltando namái que’l Conseyu de Gobiernu dea lluz verde al mesmo, un pasu que nun acaba de dar. Sicasí, pese a esta situación grave, la organización cívica considera entá más esmolecedor “que nun se dea l’otru pasu depués de la oficialización: l’usu al que ta obligada l’Alministración asturiana”. Esto ye, tres la so aprobación y espublización nel BOPA, los decretos pasen a ser “papel moyao”.

Asina, nin el BOPA nin les conseyeríes incorporen los topónimos tradicionales, dalgo que, como se pue suponer, tamién pasa nos organismos y entes dependientes de l’Alministración, como la RTPA. Pa la XDLA, el casu más aberrante ye’l de la Conseyería d’Educación, Cultura y Deporte, de la que depende la Direición Xeneral de Política Llingüística y la Xunta Asesora de Toponimia, que nun usa “lo qu’ella mesma promueve”. La organización entiende que la falta d’oficialidá nun quita pa respetar la llegalidá vixente, polo que “va empezar una campaña de reclamaciones a l’Alministración asturiana denunciando l’incumplimientu sistemáticu de los decretos d’oficialización toponímica”. Anuncia que nun va aforrar esfuerzos nin va dexar d’esplorar les víes alministratives o xudiciales pa que la llegalidá se cumpla.