La XDLA va concentrase frente a la sede de RTPA pa reclamar una televisión en llingua asturiana

Esti sábadu, coincidiendo col Día Internacional de la Llingua Materna, la XDLA va entamar una aición reivindicativa. Va ser a les 10.30 hores delantre de les instalaciones de la RTPA.

"Queremos facer visible’l papel marxinal que da la televisión pública asturiana al asturianu, funcionando como una ferramienta más de sustitución llingüística en cuenta de ser un mecanismu fundamental na tresmisión interxeneracional del idioma. La comunidá asturfalante tien derechu reconocíu na llexislación y trataos internacionales a disponer de servicios culturales y medios de comunicación qu’usen de manera vehicular la llingua asturiana", espresen dende la Xunta pola Defensa de la Llingua Asturiana. Por esti motivu, en compañía de persones venceyaes a  la televisión, esti coleutivu va concentrase a les 10.30 hores frente a la sede del ente públicu de comunicación, asitiáu na xixonesa Universidá Llaboral, en concreto nel camín de Les Clarises 236, y a entregar un escritu a la direición del mesmu.

Esta aición lleva'l nome de '#OFICIALIDÁ con toles lletres' y toma'l relevu de la yá celebrada'l día 2 frente a la Conseyería d'Educación, Cultura y Deporte por cuenta de la situación d'atascu de la especialidá docente.