La XDLA tresllada a los candidatos a rector un decálogu sobre l’usu del asturianu na universidá

Santiago García Granda opta a la reeleición como rector de la Universidá d’Uviéu con Ignacio Villaverde como rival nuna cita eleutoral que tornó a sufir un retrasu pola situación sanitaria, con votación prevista agora pal 12 de febreru. La XDLA aconceyó estes selmanes con dambos candidatos, a los que-yos treslladó un decálogu de compromisos normalizadores.

Nestes xuntes, la organización cívica trató con García Granda y Villaverde “cuestiones rellacionaes cola normalización del asturianu dientro de la institución académica y tamién s'analizaron les situaciones del vulneración de derechos llingüísticos que sigue careciendo davezu l’alumnáu”. Tamién s’entregó dichu documentu “cola mira de que lu incluyan nos sos programes eleutorales y se comprometan a llevalu alantre a lo llargo del so mandatu”.

El ‘Decálogu pal usu de la llingua asturiana na Universidá d’Uviéu’ apunta nel so puntu 1 que “la llingua asturiana ye una llingua propia d’Asturies, polo que la Universidá tien de caltenela, potenciala y curiala, garantizando’l so usu en tolos ámbitos universitarios. Los estatutos de la Universidá d'Uviéu han recoyer ente los sos oxetivos el d’actuar como ente promotor y dinamizador pa que la normalización llingüística seya un fechu real y visible pa la comunidá universitaria igual que pa la sociedá asturiana en xeneral. Lo mesmo hai que señalar pa la otra llingua propia d’Asturies: el gallego-asturianu”.

La Xunta pola Defensa de la Llingua Asturiana (XDLA) trata llueu sobre la imaxe corporativa, el Plan de Normalización na institución, la creación d’un Serviciu de Normalización, la so difusión, l’usu del idioma n’esámenes o na presentación de trabayos, la implantación d’asignatures de Llingua Asturiana específiques en tolos graos o la creación d’un grau propiu, pa finar con un puntu nel que reclama “unos presupuestos específicos de la Universidá d’Uviéu destinaos a la potenciación y puesta en marcha de les midíes descrites”. “Dende agora y hasta la fecha na que se faigan de manera efectiva les elecciones, la XDLA va siguir en contactu colos candidatos col oxetivu de que los compromisos algamaos en materia llingüística sían efectivos, reales y eficaces pa treslladar a la Universidá la necesidá de qu’asuma la so responsabilidá n'asegurar los derechos llingüísticos y ser amás un focu fundamental de normalización”, avancen.

Na imaxe, Villaverde y García Granda.