La XDLA solicita a los partíos una posición común qu’afite a la RTPA como ferramienta de normalización

Les enmiendes de Foro y IX sobre la presencia del idioma na RTPA son bien recibíes pola XDLA. El coleutivu cívicu demanda a tol arcu parllamentariu una posición común qu’afite al ente "como ferramienta de normalización social del asturianu".

La postura más cercana a les reclamaciones de la Xunta pola Defensa de la Llingua Asturiana (XDLA) ye la de Foro, yá que les sos propuestes pa que la televisión y radio públiques ayude a la normalización del asturianu y del gallego-asturiano y el puntu de la so enmienda nel qu’esixe la creación d’una industria audiovisual al traviés de la emisión de toda clase de conteníos nes dos llingües del país recueyen gran parte del espíritu del manifiestu ‘Cinco puntos por unos medios al serviciu públicu d’Asturies’, lideráu pola organización y que cuenta col sofitu de trenta coleutivos sociales, ente ellos l’Academia de la Llingua Asturiana (ALLA). Mentes, les enmiendes d’Izquierda Xunida (IX), “anque ameyoren lo qu'hai, nun son un avance sustancial: siguen supeditando l’asturianu a los campos de la educación y la cultura y falen de ‘promocionar el bable/asturianu’, non d’emitir n’asturianu. Tampoco tien sentíu referise al gallego-asturiano cola denominación de ‘modalidá llingüística’ y pidir que s’emita la programación namás nes zones nes que se fala y non en tol territoriu asturianu”, espliquen.

Sicasí, la organización cívica considera positiva la propuesta de la coalición pa qu’haya un miembru de l’ALLA nel Conseyu de Comunicación de RTPA, “dalgo que nos paez fundamental”. D’igual forma, reclama la creación de “un Conseyu Llingüísticu Asesor –con presencia de l’ALLA, Universidá, Dirección Xeneral de Política Llingüística y profesionales–, encargáu de velar poles emisiones, modelu de llingua, proponer modelos de programación, etc.”.

Felicitaciones a les dos formaciones

“La XDLA quier felicitar a estes dos formaciones por defender una presencia mayor del nuestru idioma en RTPA, dalgo que choca cola actitú de los otros trés partíos con representación parllamentaria”, afirma’l coleutivu nun comunicáu nel que recuerda que “los grupos que nun fixeron observaciones sobre la presencia del idioma na RTPA entá van tener otra oportunidá de facelo, en pasando'l Plenu de Totalidá, una y bones el PP anunció que nun va refugar el debate sobre la Llei”. D’igual forma, apunta que dos de los programes non informativos con más audiencia de marzu foron n’asturianu, lo que lleva a afirma que “naide pue negar que la llingua y la cultura propia tienen interés dientro de la nuestra sociedá, dalgo que saben en TPA al ver les audiencies de los sos programes n’asturianu”. Por esti motivu, entiende que “la dexadez de funciones d'estos otros tres partíos pareznos un despreciu a la llexislación autonómica, a los medios de comunicación públicos, al deséu de la sociedá asturiana y la nuestra identidá como pueblu. Quier dicise: un despreciu a Asturies”.