La XDLA sigue calteniendo contautos pa sumar apoyos al ‘Proyectu 2018 pola Oficialidá’

Carmen Moriyón, alcadesa de Xixón, y Adrián Barbón, candidatu a la secretaría xeneral de la FSA y alcalde de Llaviana, foron los contautos últimos de la XDLA pa sumar apoyos al ‘Proyectu 2018 pola Oficialidá’. La líder de Foro en Xixón reconoció la esistencia d’un conflictu llingüísticu, como se reflexó nuna nota d'Alcaldía.

La iniciativa de la Xunta pola Defensa de la Llingua Asturiana (XDLA)  busca que nel añu viniente s'abra la reforma del Estatutu d'Autonomía al traviés del artículu 56.1 del mesmu, que permite facelo por mor d’un pidimientu de los conceyos o d’una cuarta parte del Parllamentu, esto ye 12 diputaos, que la organización cívica yá tien comprometíos. D’esta forma, preténdese incluyir en dicha reforma la oficialidá del asturianu y gallego-asturiano.

Dende la so presentación pública en mayu, nel marcu de la Selmana de les Lletres Asturianes, la XDLA vien calteniendo contautos con responsables políticos p’algamar el mayor consensu posible pa llevar alantre la iniciativa. Asina, estos díes últimos pudieron conocer de primer mano los detalles del ‘Proyectu 2018 pola Oficialidá’ Moriyón y Barbón, candidatu que recoyó más avales que’l so competidor, José María Pérez, na so carrera pa ocupar la secretaría xeneral de la FSA: 3.215 por 2.000.

Vetu nel Arcu Atlánticu

Nel casu de l’alcaldesa de Xixón, l’aconceyamientu vieno depués de la polémica pol vetu del Festival Arcu Atlánticu a una charra propuesta pola XDLA pa esplicar qué ye’l ‘Proyectu 2018 pola Oficialidá’. Nel alcuentru Moriyón “reconoció que l'actu sí tenía encaxe nel festival, qu'esti añu ta dedicáu a les llingües minoritaries d'Europa” y “comprometióse a facilitar un espaciu municipal pa dar a conocelo nos meses vinientes, cuasi seguro en setiembre”, esplica la organización nuna nota.

“Ye de reseñar que Moriyón presentó una actitú bien diferente a la de les responsables de la Conceyalía de Cultura y reconoció la existencia d'un conflictu llingüístu n'Asturies, dalgo que ye menester solucionar”, añade la XDLA, qu’agradez el sofitu recibíu por coleutivos y partíos políticos énte “una actitú censora y irrespetuosa cola nuestra organización y con tol movimientu de reivindicación llingüística, que lleva 40 años na cai lluchando pola sobrevivencia del principal patrimoniu cultural del pueblu asturianu”.

“Pa la nuestra organización, nestos momentos hai posibilidá de construir el consensu necesariu p'algamar la oficialidá nel 2018 y solucionar el conflictu llingüísticu nel nuestru país. Y ye que l'actual marcu llegal del idioma, amparáu nel artículu 4 del Estatutu, ye'l que nun tien consensu, como muestren toles encuestes y la movilización constante d'una parte importante de la sociedá asturiana. La realidá social d'Asturies vese superada por esi marcu llegal y lo único que pue acabar col conflictu y dar solución pa la convivencia de les llingües d'Asturies implica, necesariamente, la reforma del Estatutu y la inclusión de la oficialidá”, asegura la XDLA.