La XDLA refuga les pallabres de Javier Fernández en Madrid, al que tacha d’ultraconservador

|
José Luis Rodríguez, Javier Fernández y Alfredo Pérez Rubalcaba

“Nun somos a entender cómo una persona que se diz progresista ve los derechos cuidadanos como una amenaza, como fixeron y siguen faciendo los sectores ultraconservadores”, llamenta la Xunta pola Defensa de la Llingua Asturiana (XDLA). La organización refuga les pallabres de Javier Fernández el martes en Madrid.

Pese a reconocer, a entrugues de periodistes, que’l futuru candidatu de la Federación Socialista Asturiana (FSA) a la Xunta Xeneral ha d'asumir la oficialidá del asturianu y del gallego-asturiano, el presidente del país caltuvo na Tribuna del Fórum Europa, qu’entama Nueva Economía Fórum nel madrilanu Hotel Ritz, la so postura contraria a esta reconocencia de derechos de los falantes d'estos dos idiomes, llegando a señalar que "conlleva riesgos" pola esistencia de grupos "que van pensar na llingua asturiana menos como un elementu de comunicación que nun factor d’identidá". "Nun sabemos si'l presidente ye partidariu d'un procesu d'etnocidiu llingüísticu y d'eliminar amás los horros, l'arte asturianu, Cuadonga, el paisaxe o la gastronomía asturiana pa que'l territoriu quede llibre de cualquier posible peligru identitariu", retruca la XDLA, qu'acusa a Javier Fernández d'usar l'argumentariu de los sectores ultraconservadores contra l'asturianu.

“Con declaraciones como les de Javier Fernández vese que les idees progresistes queden-y mui lloñe. Parez que-y queden más cerca les posiciones del partíu de Mercedes Fernández, que, col aplausu d'una minoria ultraconservadora y intolerante, nagua por arrampuñar unos pocos votos a la ultraderecha”, añade’l coleutivu cívicu, que recuerda que “la oficialidá namás que supón la igualdá de derechos ente tolos ciudadanos d'esta tierra y dicir qu'eso podría llevar a riesgos identitarios ye propio d'otres époques predemocrátiques, onde namás se podía usar una llingua: el castellanu. Y esi ye'l mayor exemplu de nacionalismu, el nacionalismu de ‘una, grande y libre’”.

La XDLA tien el marcha el ‘Proyectu 2018 pola Oficialidá’ cola fin d’entamar una reforma del Estatutu d’Autonomía qu’incluya la oficialidá del asturianu y gallego-asturiano, “y la posibilidá ye agora”, aseguren. “Los derechos nun s'aplacen a conveniencia con argumentos tan floxos como que ‘nun procede’. Claro que procede. Lleva ‘procediendo’ dende hai más de trenta años ante la pasividá de los partíos mayoritarios n'Asturies. Agora ye'l momentu y nengún demócrata pue aplazar el reconocimientu d'un derechu básicu como ye'l de la igualdá xurídica de les llingües propies d'Asturies”, sentencia esti coleutivu.

Na imaxe, José Luis Rodríguez, presidente de Nueva Economía Fórum; Fernández; y el socialista Alfredo Pérez Rubalcaba, ayeri nel almuerzu informativu celebráu en Madrid. Semeya obra d'Armando Álvarez.

Contador Estadistiques