La XDLA pide más compromisu pa la estabilidá de los Servicios de Normalización Llingüística

La Xunta pola Defensa de la Llingua Asturiana (XDLA) reclama al Gobiernu y a los conceyos más compromisu p’asegurar la estabilidá de los Servicios de Normalización. Pal 2013 habrá recortes nos presupuestos pal so caltenimientu.

“Depués de que se diera a conocer que pal 2013 el Gobiernu asturianu va recurtiar nun 20 por cientu’l presupuestu que destina al traviés de tresferencies direutes pal mantenimientu de los Servicios de Normalización Llinguïstica (SNL), la Xunta pola Defensa de la Llingua Asturiana pide a los conceyos que cuenten con un serviciu d'estes carauterístiques que muestren el so compromisu con estes entidaes y colos puestos de trabayu que xeneren”, esplica la organización nun comunicáu. Tamién esixe a les alministraciones llocales que collaboren col Executivu “pa permitir el mantenimientu de los 14 SNL qu’hai anguaño n'Asturies, dalgo que, amás de xenerar puestos de trabayu direutos –alredor d'una ventena– y indireutos –al traviés de la ellaboración de materiales pa les campañes de normalización–, permite ayudar a salvar un patrimoniu inmaterial del que ye dueñu tola ciudadanía d'esti país, anque nun-y correspuende a naide más qu'a los políticos –dende les corporaciones municipales a l'autonómica– ufrir los preseos afayadizos pa asegura-y un futuru”.

Pese a entender el contestu de crisis actual, la XDLA diz nun comprender que sía la llingua asturiana la víctima habitual a la hora de facer retayos. “L'asturianu nun ye un caprichu culturalista d'unos pocos. Non. Amás d'una llingua con falantes –polo tanto, persones con derechos–, l'asturianu ye un sector económicu que da de comer a un bon númberu de persones. Nun se pue entender la defensa que faen con una mano d'otros sectores productivos, mentes afueguen cola otra a la industria cultural d'esti país, cuando según tolos estudios, el de la cultura ye ún de los sectores económicos con más proyeición de futuru”, aseguren. Por esti motivu, la organización cívica reclama al Gobiernu “un compromisu y una atención mayor al funcionamientu y estabilidá d'estos servicios, pero sobre manera, un compromisu a les entidaes llocales, que na mayoría de los casos, a lo llargo d'estos años, nun se comprometieron colos SNL y colos sos trabayadores, importándo-yos bien poco les sos condiciones llaborales y el dotar a los servicios d'un presupuestu propiu”.

Por último, considera tamién necesario que la Direición Xeneral de Política Llingüística cree una figura xurídica “que diera estabilidá a estes entidaes, dalgo qu'amás diba permitir una mayor coordinación pa entamar campañes y que diba abaratar los costes de les mesmes”.