La XDLA pide al Gobiernu que siga les recomendaciones d’Europa sobre la diversidá llingüística

La Comisión de Cultura del Parllamentu Européu aprobó en xunu un informe que recomienda la diversidá llingüística nel continente. La XDLA pide al Gobiernu que tenga en cuenta esti documentu pa preservar l’idioma del país.

L’eurodiputáu corsu François Alfonsi, del Partitu di a Nazione Corsa y integrante del grupu Verdes/Alianza Llibre Europea, foi l’impulsor d’esti informe que, tres pasar por un procesu d’enmiendes, aprobóse por unanimidá na cámara. El documentu garra como base’l mesmu Tratáu de Lisboa y recueye que la proteición de la diversidá ye ún de los principios fundacionales de la Xunión Europea (XE). Tamién afirma que tolos idiomes del continente son iguales en valir y dignidá porque reflexen la riqueza d’Europa, polo que pide a les autoridaes que sían más conscientes de l’amenaza grave que sufren munches llingües y que se comprometan coles polítiques pa preservar la diversidá cultural d’Europa, apoyando polítiques ambicioses de salvaguarda.

D’igual forma, califica de “arcaísmu” identificar nación y llingua única o intentar establecer dinámiques de sustitución llingüística pa tratar d’implantar rexímenes monollingües, lo que considera una vulneración de los valores fundacionales de la XE. La Comisión de Cultura del Parllamentu Européu fala de la importancia de revitalizar les llingües minoritaries al traviés del sistema educativu –cola educación preescolar y Primaria como principal activu, amás de la formación pa los padres–; l’establecimientu de procedimientos d’evaluación; programes pa los medios de comunicación –cola posibilidá de crear y desarrollar emisores de radio y televisión–; y l’impulsu nes artes y en toles formes de la vida pública. Tamién recuerda’l papel importante de los medios de comunicación comunitarios pa salvaguardar y tresmitir estes llingües.

Pa la Xunta pola Defensa de la Llingua Asturiana (XDLA), estes recomendaciones choquen coles polítiques feches hasta la fecha pol Gobiernu. “Pon toles trabes posibles a que l’asturianu espoxigue nes escueles; obliga a RTPA a tener un porcentaxe d’emisión nel nuestru idioma perbaxo del 5 por cientu; y ta afogando la industria cultural del país con recortes que medren añu tres añu y que tán dexando a munches persones na cai, mentes qu’invisibiliza l’idioma na so actividá pública”, señalen dende’l coleutivu cívicu, que tamién recuerda como la radio única qu’emite n’asturianu dafechu, Radio Sele, ta nuna situación más que complicada por, ente otros asuntos, nun poder disponer de la llicencia comercial que-y correspuende. Dada esta situación, la XDLA pide al Executivu “que siga les recomendaciones de la Xunión Europea pa la recuperación de les llingües en peligru”. “Éstes estructúrense en trés exes: un estatus xurídicu afayadizu centráu nel reconocimientu de los derechos llingüísticos de los falantes; l’encargu de la so salvaguarda polos poderes públicos; y una política llingüística activa pa fomentar el conocimientu y usu de la llingua pola ciudadanía”, añaden dende esta asociación.

Croacia, estáu nuevu de la XE

La Xunión Europea cuenta, dende güei, con un estáu miembru nuevu. Trátase de Croacia, primer país balcánicu que pasa a formar parte de l’alianza europea tres Eslovenia (2004). Continúen pendientes de consiguir l’aval del restu d’estaos miembros Montenegro, Serbia, Turquía, Macedonia y Islandia.