La XDLA pide a RTPA que dedique les perres destinaes a la serie ‘El Faro’ a rodar ficción n’asturianu

TVG va rodar la segunda temporada de ‘El Faro’, pero RTPA nun va poner perres tres los datos malos d’audiencia de la serie. Por ello, la XDLA pide a la direición del ente que dedique esi dineru a entamar ficción en llingua asturiana.

 

“La realización de productos asina pola TPA, amás d’ayudar a xenerar datos bonos d’audiencia, repercutiría na economía del nuestru territoriu al ayudar a promover una industria audiovisual autóctona. Sicasí, la cadena tovía nun fixo un apueste poles series de producción propia, pola emisión d’obres de teatru o pol doblaxe al asturianu de ficción ayena, dalgo qu’ayudaría a xenerar puestos de trabayu y al nacimientu d’un texíu audiovisual nel país”, apunten dende la Xunta pola Defensa de la Llingua Asturiana (XDLA), organización que recuerda que de los quince programes estrenaos a lo llargo del añu nengún tien como llingua vehicular l’asturianu, “dalgo que muestra l’incumplimientu que fai la cadena de la llexislación vixente, qu’establez que TPA tien qu’usar y promover el nuestru idioma”. D’igual forma, señala que la ficción na llingua propia siempre quedó como líderes nos sos respeutivos territorios.

 

Un exemplu ye la propia serie ‘El Faro’, rodada en gallego –cola esceición d’unos pocos actores qu’empleguen el castellanu– y emitida nesi idioma en Galicia, consiguiendo cuotes de pantalla cercanes al 20 por cientu en dalgunos capítulos. Mentes, en TPA, llegó a tener un probe 0,1 por cientu –na estrena rexistró un 1,3 por cientu pese a la promoción fecha pola canal–, lo que llevó a la direición a pasar la producción de la tarde a la mañana, franxa onde agora tan emitiendo otra vuelta los primeros episodios. Esti ésitu nel país vecín lleva agora a TVG a rodar una segunda temporada, anque nesta ocasión va ser en solitariu, yá que la primera foi una coproducción de tolos canales de la FORTA –a esceición de l’autonómica murciana– y Canal Extremadura. De toes elles, namái se emitió en Galicia, Asturies, Aragón, Comunidad de Madrid y Castilla-La Mancha, siendo l’aragonesa la única otra televisión que tuvo bones cuotes de pantalla cola serie, cercanes al 15 por cientu.