La XDLA movilízase énte un "espectáculu llamentable" que va tener continuidá'l vienres

Mercedes Fernández va entrugar a Javier Fernández na Xunta Xeneral sobre si la cooficialidá ye una prioridá pal so Gobiernu. La concentración 'Pola dignidá del asturianu' va celebrase esti xueves a les 17 hores frente al edificiu parllamentariu.

El presidente del país responderá delles preguntes na sesión plenaria de mañana, con entamu previstu pa les 10 hores, ente elles la de la líder popular. En concreto, Mercedes Fernández va entrugar si la promoción de la cooficialidá llingüística ye una prioridá pal Gobiernu de la FSA-PSOE, una cuestión que sorprende dada la posición histórica que caltién esta formación con respeuto al idioma y que nun tien otra que siguir atacando a la llingua del país.

Ensin dulda, un capítulu más del "espectáculu llamentable", en pallabres de Carlos Pulgar, qu'anició la presidenta del Partido Popular (PP) d'Asturies cola so negativa al emplegu del asturianu na Xunta Xeneral, a lo que se sumó'l tweet incendiariu nel que presumía de consiguir que'l castellanu fora la única llingua que s'utilizara nel Parllamentu asturianu. Una postura basada nel propiu reglamentu de la Cámara que FSA-PSOE, Foro y Ciudadanos sofitaron tres apoyar nun primer momentu l'usu del idioma na Comisión d’Estudiu sobre Réxime, Proteición y Promoción del Asturianu.

"Vamos mostra-y a Mercedes Fernández que n'Asturies del 2016 nun permitimos qu'una representante pública muestre'l so contentu por nun dexar usar l'asturianu na sede de los representantes d'Asturies nin siquiera de manera testimonial", añade'l voceru de la Xunta pola Defensa de la Llingua Asturiana (XDLA), coleutivu qu'entama esta tarde una concentración pa reclamar la "dignidá del asturianu". Ésta va dar aniciu a les 17 hores y va contar cola presencia de la recuperada Pita de la Xunta.

Sofitu de políticos, coleutivos sociales y sindicatos

La convocatoria de la XDLA va contar tien confirmada l'asistencia de los cinco diputaos d'Izquierda Xunida y s'espera tamién la participación de representantes de Podemos. Tamién anunciaron el so sofitu a la convocatoria Iniciativa pol Asturianu, Andecha Astur, la Corriente Sindical d'Izquierda (CSI), el Sindicatu Unitariu Autónomu de Trabayadores de la Enseñanza d'Asturies (SUATEA), el Llar La Llegra o La Madreña, ente otros.