LA XDLA llamenta la intervención de González pola falta de referencies a la situación del asturianu na enseñanza

|

La intervención d’Ana González nel Parllamentu pa esplicar les llinies de trabayu xenerales del so departamentu nun convenció a la XDLA. Critica la inconcreción del so discursu y la omisión de la situación del asturianu na enseñanza.
 
Nun comunicáu, la Xunta pola Defensa de la Llingua Asturiana (XDLA) apunta que, en materia de política llingüística, la conseyera d’Educación, Cultura y Deporte “sólo fixo referencies a una supuesta promoción del usu del asturianu per parte de l'Alministración y al posible cambiu d’estructura na celebración de la Selmana de les Lletres Asturianes”, dos anuncies que la organización cívica considera “de lo más secundario y con un grau d’ellaboración, ciertamente, pa llamentar”. N’opinión del coleutivu, “ye d'esperar que los nuestros representantes públicos se presenten nes instituciones representatives a contar realmente lo que van facer y non a facer un corta-apega de los sos mediocres programes políticos, como ye d'esperar tamién que les polítiques que se van desarrollar tengan como un mínimu imprescindible'l cumplimientu de la llexislación vixente na materia y nun supongan, per elles mesmes, una rebaxa constante de los derechos que la ciudadanía yá tien reconocíos”.
 
Pero lo que realmente la XDLA considera “plasmante” ye “l’absoluta falta de referencies a la situación de la enseñanza del asturianu nel sistema educativu” que fixo González. “Equí, la comparecencia tornóse en surrealista al nun facer neguna referencia a esti problema tán vixente anguaño. Nada se dixo de la creación de la Especialidá de Llingua Asturiana pal profesoráu y, tovía más, nada se dixo del cumplimientu de les sentencies d'abolición de la ratio que gobiernos anteriores insistieron en vulnerar, siendo agora la so obligación el recordar a tolos centros educativos d'Asturies que tienen qu'ufiertar la asignatura a toles persones que lo soliciten”. Dada esta situación, la organización de defensa del idioma insta a la Conseyería y a la Direición Xeneral de Política Llíngüistica “a preparar unes actuaciones sistemátiques de normalización que nun reduzan el so llabor a simples declaraciones d'intenciones y al sordu continuismu burocráticu”.

Contador Estadistiques