La XDLA insiste na so denuncia sobre la situación del asturianu na RTPA

|
Oficialidá RTPA XDLA

“RTPA sigue dando'l llombu a la sociedá asturiana con una programación marcada polos prexuicios ideolóxicos de la so dirección y del conseyeru de Presidencia” Guillermo Martínez, afirma la XDLA. El coleutivu cívicu denuncia’l tratu y la presencia mínima del asturianu tanto na televisión como na radio pública.

“Sigue marxinando los conteníos nel nuestru idioma, l'usu de la toponimia oficial y tratando al nuestru patrimoniu llingüísticu –nos más de los programes– como una caxigalina que namás val pa facer chancia y pa los conteníos más d’andar per casa. Ye una situación qu’incumple sistemáticamente la Llei d'Usu, a la qu'agora dalgunos tanto s'agarren”, continúa la Xunta pola Defensa de la Llingua Asturiana (XDLA), que señala como responsables a la FSA vieya, “la de Javier Fernández y Guillermo Martínez”, y al direutor xeneral de RTPA, Antonio Virgili.

Un exemplu de la llaceriosa situación del idioma vivióse nel Día de les Lletres Asturianes: “Na primer canal de TPA programaron una película doblada al castellanu. Mentanto, una hora más tarde, la segunda canal programa la mesma película doblada al asturianu. Esto, amás de suponer que na cadena tienen programadores poco espiertos que nun entienden que l'audiencia va buscar lo que nun ve n’otros canales –nesti casu una película n’asturianu–, ye un exemplu claru de marxinación y de la idea que tienen los responsables de los medios públicos de priorizar la versión castellana sobre l'asturiana (que se fixera a costafecha pa emitila en TPA)”. Esti filme yera ‘Harry el Suciu’.

“La TPA, quitando poques escepciones que son gotines nuna programación mayoritaria en castellanu –o nun castellanu con interferencies n'asturianu–, sigue marcada pola diglosía y por programes de baxa calidá qu'imiten los programes de les televisiones estatales. Una situación que fai que la sociedá asturiana dea cada día’l llombu a la que tendría que ser la so televisión, que tamién ye la televisión xeneralista con menos espectadores n’Asturies”, apunten dende’l coleutivu cívicu.

Mesma situación na radio

La RPA tampoco nun se llibra d’esti esperpentu, yá que “l'usu de la toponimia oficial sigue incumpliéndose día a día”, nun “emite música nel nuestru idioma fuera de la Selmana de les Lletres” y la presencia del asturianu ye de 10 minutos diarios de llunes a vienres, lo qu’asemeya la radio pública “a una radio local de Madrid”. “Esta desconexón cola realidá cultural asturiana fai que güei RPA sía la radio xeneralista con menos oyentes n'Asturies”, añaden.

“Esperamos un cambiu na política de programación pa que la desconexón qu'existe ente la RTPA y la sociedá asturiana nun faiga que los medios públicos tengan, igual que l'Executivu de Javier Fernández, los díes cuntaos”, sentencia la XDLA, que considera l'ente públicu de comunicación un "instrumentu d'una FSA vieya pa incumplir una llei d'usu que yá nun val".

Contador Estadistiques