La XDLA encamienta al Gobiernu a presentar una propuesta de reforma del Estatutu que recueya la oficialidá

“Ye la so potestá esclusiva y la so obligación”, amás de “una promesa electoral de la FSA”. La Xunta pola Defensa de la Llingua Asturiana (XDLA) encamienta al Gobiernu a presentar una propuesta de reforma del Estatutu que recueya la oficialidá depués del ésitu de la manifestación del sábadu pol XLIII Día de les Lletres Asturianes.

La organización valora la cantidá de xente que participó na marcha, con una presencia alta de mocedá, asina como los numberosos coleutivos sindicatos, partíos y asociaciones qu’acudieron a Uviéu na mañana del sábadu. “La causa de la defensa de les llingües y los derechos de la comunidá falante d’asturianu y de gallego-asturianu tien más puxu que nunca. A pesar del parón institucional que nos quieren vender como insalvable, a pesar de los pasos atrás nel procesu de recuperación llingüística, sabémonos cola razón de la nuestra parte y tenemos el trunfu caldía más cerca”, asegura la XDLA, que diz ver cumplíos los dos sos oxetivos cola manifestación pol XLIII Día de les Lletres Asturianes: “retratar otra vegada a los enemigos de la oficialidá como los enemigos del asturianu y de la cultura en xeneral” y “poner argumentalmente contra les cuerdes a los qu’apuesten por apostalgar la declaración de la oficialidá a la siguiente llexislatura, dando por inhabil l’añu llargu que queda de la presente”.

“Prueba d’esi pesu argumental de la XDLA ye que’l presidente Adrián Barbón vio necesario salir al otru día de la manifestación a repetir el mantra de ‘tenemos 26 votos, fáltanos ún’, o l’otru de ‘nun hai oficialidá porque la derecha votó en contra’, considera esti coleutivu. “Son falses les dos afirmaciones. Pa saber si hai 6 o 26 votos favorables, pa poder afirmar que tal o cual partíu va votar en contra tien que producise esa votación. Y esa tovía nun la vimos”, añade.

“Dannos tamién la razón les declaraciones al otru día d’Adrián Pumares, de Foro, instando al presidente a presentar la so propuesta d’oficialidá si ye que la tien. Anque más bien paez la escenificación d’un órdagu poco creyible cuando nun pasaron nin cuatro selmanes desde qu’esti mesmu diputáu votaba en contra d’una proposición non de llei presentada por Podemos que pidía esactamente eso mesmo”, analiza la XDLA, qu’encamienta al Gobiernu a presentar “una propuesta de reforma del estatutu d’autonomía que recueya la declaración d’oficialidá. Ye la so potestá esclusiva y la so obligación. Ye amás una promesa electoral de la FSA”.

Mentes, al restu de partíos “pidímos-yos que debatan, argumenten, enmienden, consensúen y terminen por aprobar una redacción definitiva del artículu 4 que-y ponga puntu final a una inxusticia histórica que padecen les asturianes y los asturianos. Cuando la voluntá del pueblu s’espresa tantes vegaes con madurez, los sos representantes d’anguaño tienen que tar al altor pa nun dexar esa reivindicación ensin respuesta. Nun hai razón pa esperar a otres elecciones”.