La XDLA diz que la continuidá de Virgili dexa en papel moyao'l Plan de Dignificación del asturianu

La organización recuerda que ye menester que'l contratu-programa y el mandatu-marcu desenvuelvan reglamentariamente la Llei d'Usu

Pa la Xunta pola Defensa de la Llingua Asturiana (XDLA), "el fechu de que PSOE-PP-IX decidieren apostar pola contunidá d'Antonio Virgili al frente de la RTPA dexa en papel moyao'l plan de dignificación del asturianu, aprobáu apocayá na Xunta Xeneral, amás del alcuerdu d'investidura ente PSOE y IX".

Acordies cola Xunta "los dos testos falen de potenciar l'usu del nuestru idioma na programación de la radiotelevisión pública. Sicasí, esto choca cola renovación d'un director que nun quixo normalizar l'usu del idioma na programación y que namás lu arrequexó pa los usos humorísticos y diglósicos, ensin nengún procuru pa cola so corrección y calidá".

La organización tamién recuerda que "nun se fixo apueste pola programación infantil n'asturianu, dalgo estratéxico si se quier dar un futuru al nuestru idioma al traviés de la so tresmisión interxeneracional" y que "Virgili ta a puntu de firmar un alcuerdu cola multinacional americana Warner, nel que se van invertir dos millones d'euros que van salir del bolsu de tolos asturianos, pero que nun van xenerar nengún beneficiu nel territoriu".

Con too, "la organización recuerda que tovía queden dellos cargos por nomar na dirección de la empresa pública, como'l de director de programación, que puen ser vitales pa que se faiga una política activa pol asturianu, polo que ye imprescindible cuntar con xente comprometío cola cultura asturiana nestos cargos".

La organización de derechos llingüísticos pide tamién "que los partíos políticos y el Gobiernu asturianu empiecen a trabayar nel contratu-programa y nel mandatu-marcu, testos que van desenvolver la Llei de RTPA y onde se tienen que recoyer los porcentaxes llingüísticos y el modelu de programación nes emisores públiques".

Pa cabu dende la Xunta fítase que "na presencia amañosa pa Virgili y el so equipu parez qu'hasta agora foi'l 5%, polo que ye hora de dar pasos alantre y facer un apueste por cumplir y desenvolver la llexislación, ofreciendo na emisión conteníos nuevos que reflexen una imaxe moderna de la cultura asturiana, non namás tradicional".