La XDLA destaca la necesidá de revisión de les propuestes del Llibru Blancu depués de 15 años

Cúmplense 15 años de la espublización de Llibru Blancu, documentu de propuestes pa la recuperación y normalización del idioma. Por esti motivu, la XDLA cree necesario facer una revisión del mesmu, pa lo que pon en marcha unes xornaes.
 
Espertos y trabayadores de la llingua asturiana van ser los encargaos de repasar les reivindicaciones principales incluyíes nel Llibru Blancu, según anunciaron esti martes Carlos Pulgar, Xosé Miguel Suárez y Llucía Menéndez, representantes de la Xunta pola Defensa de la Llingua Asturiana (XDLA), organización qu'entama esti periodu de revisión y actualización. Suárez esplicó les necesidades d’entamar esti procesu basándose nos cambios que, en materia de llingua asturiana, tuvieron llugar dende 1996. Asina señaló que, nel sistema educativu, hubo una implantación importante, especialmente en Secundaria, y que la decisión de crear l'asignatura "yá nun ye del Conseyu Escolar, sinón de los padres", pero fixo referencia a les dificultaes que la llingua atopa en munchos centros o al debate sobre la situación d'optatividá de la materia.
 
Tamién se refirió a la mayor presencia de la llingua asturiana nos medios de comunicación, reflexada na existencia de dellos portales dixitales, una axencia de noticies o un periódicu. Pero tamién señaló la situación de "precariedá" nos medios públicos, qu'analizarán dellos especialistes. Pela so parte, Pulgar comentó la situación de los Servicios de Normalización. El voceru de la XDLA destacó que se crearon munchos, yá qu’un 60 por cientu del territoriu asturianu ta nesti momentu cubiertu, pero recordó que sobreviven nunes condiciones "d'inestabilidá" continues.
 
Con esti envís van facese cuatro meses redondes, formaes por espertos y trabayadores de dellos sectores venceyaos cola llingua asturiana, pero nes que podrán tomar parte cualquier ciudadanu que lo considere oportuno. La primera d’elles va celebrase’l día 19 nel Antiguu Institutu de Xixón baxo’l nome ‘Enseñanza: de la presencia a la normalización’. Ésta va tar moderada por Xosé Candel y va contar cola presencia de Xosé Antón González Riaño (profesor de Didáutica na Universidá d'Uviéu), Beatriz Quirós (presidenta de la Xunta de Personal Docente), Paz Fonticiella (profesora de llingua en Secundaria) y Iris Díaz (profesora en Primaria).
 
El departamentu de Filoloxía de la Universidá d’Uviéu, n’El Milán, va acoyer les trés restantes: 'Medios de Comunicación na sociedá de la información', cola participación de los periodistes Naciu Varillas, Ana Vanessa Gutiérrez, Próspero Morán y Cristóbal Ruitiña, cola moderación de Rubén Ardura, que va tener llugar el 1 de febreru, a les 18 hores; 'Hacia la consolidación y espansión de los Servicios de Normalización Llingüística', con Penélope Miranda y María Xosé Rodríguez (trabayadores de servicios de normalización), Adolfo Camilo (xestor cultural) y Esteban Intrialgo (abogáu), cola moderación de Mónica Riesgo, el 15 de febrero a les 18 hores; y 'Recuperación y normalización llingüística d'Asturies', con Carlos Pulgar, Ramón d'Andrés (profesor de Filoloxía Asturiana na Universidá d'Uviéu) y David Guardado (filólogu), cola moderación de Llucía Menéndez, el 29 de febreru a les 18 hores.