La XDLA demanda que la RTPA “sía reflexu del cambéu de sensibilidá pa cola llingua asturiana” na Xunta

La mayoría parllamentaria favoratible al asturianu na Xunta Xeneral ha de tener reflexu na presencia de la llingua asturiana na RTPA. “Tien qu'encarar yá un cambéu na dirección de los medios públicos y el desarrollu del mandato-marcu”, demanda la XDLA, que critica l’ausencia de programación na llingua llariega nel Día d’Asturies.

“L'asturianu namás apaeció a les 0 hores na repetición d'una película doblada a esta llingua. La situación manca más cuando esi día s'emitieron dos películes en castellanu rodaes n’Asturies, que cuntaron colos meyores horarios y una campaña de promoción importante a lo llargo de tola selmana. Foi un exemplu de la política de programación de la cadena: al revés de lo que faen les demás canales autonómiques, la TPA discrima los conteníos nel idioma propiu”, denuncien.

Nos casi 15 años de vida de la TPA, sólo emitió “siete películes doblaes al nuestru idioma,  dexando de llau la importancia del doblaxe pa la normalización y normativización d'una llingua y los puestos de trabayu que xeneraría una industria dedicada a esos menesteres”, añade la Xunta pola Defensa de la Llingua Asturiana (XDLA). Una situación que nun camuda, yá que “nada nun se sabe de más doblaxes y vemos cómo la TPA ta promocionado programes nuevos, toos en castellanu, lo que muestra que la cadena sigue cola so política de marxinación hacia'l patrimoniu llingüísticu d'esta tierra”.

Esta situación, a lo qu’hai que sumar el tratamientu de la toponimia y l’ausencia de música n’asturianu en RPA, supón un incumplimientu sistemáticu de la Llei d'Usu y la Llei de RTPA, apunta’l coleutivu, que-y recuerda a la FSA que na enmienda aprobada nel so Congresu últimu afitábase que, “mentanto nun se reformara l'Estatutu, diba fomentase la presencia de la llingua asturiana en RTPA desarrollando la Llei d'Usu”, dalgo qu’entá nun se cumplió. “Ye menester que la radio y la televisión pública sían un reflexu de la sensibilidá nueva pa cola llingua asturiana qu’existe na representación política mayoritaria na Xunta Xeneral, que tien qu’encarar yá un cambéu na dirección de los medios públicos y el desarrollu del mandato-marcu”, esixe la XDLA.

Na imaxe, Plenu de la Xunta Xeneral pol Día de la Nación Asturiana. Semeya obra de José Vallina.