La XDLA decide cola familia de Solar entregar l'últimu premiu que lleva'l so nome

|
Gala entrega Premios Andrés Solar

"Nestes décades d'historia, el premiu cumplió yá de sobra'l so papel", considera'l coleutivu, que dedica l'últimu a tola militancia.

El XXXVIII Premiu Andrés Solar va ser el postreru. Asina lo decidió la Xunta pola Defensa de la Llingua Asturiana (XDLA) xunto cola familia del escritor de Deva.

Creáu pa reconocer el llabor de persones o entidaes a favor del idioma y recordar al poeta al traviés del Pegollu –hasta la edición trentena quinta tamién s'entregaba la Madreña de Purpurina, la so vertiente negativa–, les dos partes consideren que l'oxetivu col que nacieron los premios cumplióse ampliamente y el 2 d'abril va facese la entrega última. Esti Pegollu va ser pa tola militancia "nun sentíu ampliu, esto ye, militantes que lo fueron en dalgún momentu de la nuestra historia que, precisamente, l'añu qu'entra cumple 40 años".

Nel actu, previstu pal sábadu 2 d'abril a les 14 hores na sidrería Canteli de Xixón, va servir tamién d'homenaxe a Xuan González, fináu recién. Ta convidada a participar tola xente que milita o militó na XDLA y va consistir nuna espicha con places llendaes, polo qu'hai que confirmar asistencia enantes del domingu ingresando 25 euros na cuenta de la organización (ES72 3059 0087 5127 8695 8120) y avisando nel corréu electrónicu info@exunta.org.

Na semeya, una gala d'entrega de los Premios Andrés Solar celebrada nel xixonés Antiguu Institutu.

Contador Estadistiques