La XDLA critica la participación de la televisión pública asturiana na coproducción gallega “El Faro”

La Xunta pola Defensa de la Llingua Asturiana (XDLA) amosó'l so descontentu pola participación de la TPA na producción de “El Faro”. La serie ta financiada por TVG y les canales de la Forta, y va rodase en gallegu y castellán.

Nun comunicáu, la XDLA recuerda qu'unu de lo oxetivos de les televisiones autonómiques ye caltener y promocionar la llingua y la identidá cultural de la comunidá a la que se dirixen, daqué que la TPA incumpli al financiar un productu rodáu en gallegu y castellán y qu'amás refuga cualquier referencia concreta a la identidá cultural especifica de caúna de les distintes comunidaes que participen nella. Pa la Xunta, esto respuende a la política cultural de la Federación Socialista Asturiana “caracterizada pol complexu d’inferioridá y l’odiu a lo propio”.

Dende la Xunta tamién critiquen que mientres les cadenes autonómiques tán apostando cada vez más poles series de ficción de producción propia, la TPA inda nun produció nenguna nin dobló al asturianu ficción ayena, daqué qu'ayudaría a xenerar puestos de trabayu y contribuyiría a xenerar un texíu audiovisual nel país. Destaca que'l porcentaxe d'emisión en llingua asturiana nun llega nin al 5% a pesar de les altes audiencies. “TPA paga’l rodaxe d’una telenovela en castellanu producida n’otra comunidá y que nun van dar trabayu a nengún asturianu” señalen na XDLA, una iniciativa que pa l'asociación ye esbardiar el presupuestu d'una canal que, recuerden, “pagamos tolos asturianos” y que ta contribuyendo “a que la cadena dexe de tener sentíu”.

La XDLA nun foi la única asociación que criticó'l rodaxe de "El Faro". La Coordinadora de Profesionais do Audiovisual Galego refugó públicamente'l so modelu de producción, qu'ufierta a técnicos, guionistes y directores sueldos bien inferiores a los actuales precios de mercáu, y que nel casu de los actores nin siquier avérense a los mínimos establecíos nel so conveniu colectivu.