La XDLA critica “la vaguedá y inconcreción” del plan de dignificación no que se refier a la RTPA

Llamenta’l “desaxuste ente les motivaciones d'esta PNL y les acciones que se proponen al final”. “Les midíes puen quedar en nada ensin una dirección xeneral de RTPA comprometida colos derechos llingüísticos”, alerta énte los nomes que se manexen.

“Lo primero que rescampla ye'l contraste ente l'argumentación que se fai na esposición de motivos y l'articuláu posterior de la proposición. Na esposición de motivos recuéyese de manera acertada la falta de derechos llingüísticos que sufre Asturies y l'agraviu comparativu que supón que n'otros territorios sí tean reconocíos al traviés de la cooficialidá. Tamién se destaca lo inxusto, discriminatorio y antidemocrático d'esta situación que nun se pudo o nun se quixo iguar en toos estos trenta años últimos. Llama l'atención que la conclusión d'esti preámbulu nun sía la de tratar de solucionar d'una vez esta falta de derechos diendo camín del reconocimientu del estatus xurídicu d'oficialidá, sinón que se vuelvan a proponer midíes de ‘protección y impulsu’ que nos párrafos anteriores reconociéronse ‘insuficientes y ineficaces’”, espón la Xunta pola Defensa de la Llingua Asturiana (XDLA) nun comunicáu.

La organización cívica entiende que d’aplicase les midíes del plan de dignificación de la llingua asturiana qu’ha d’aprobar el Conseyu de Gobiernu “seríen positives pal procesu de normalización llingüística del  asturianu”, pero considera qu’hai delles cuestiones nes que detecta vaguedaes y inconcreciones, sobre manera no que se refier a la RTPA. “La ferramienta de comunicación básica y principal d'Asturies, que tenía que tener un papel fundamental como vehículu de normalización social del asturianu, queda despachada con un oxetivu tan probe como'l de ‘impulsar l’ampliación d'espacios’, viendo que llevamos una década de porcentaxes ínfimos, tematizaos y marxinales. Ye inasumible que los derechos de la ciudadanía y el cumplimientu de les lleis queden a los deleres de los órganos xestores del ente y d’una dirección xeneral continuista na falta de rigor y compromisu col asturianu”, critica al empar demanda una dirección del ente “comprometida colos derechos llingüísticos”.

González Orejas y Virgili, posibles direutores xenerales.

La negociación pola eleición del direutor próximo de la RTPA yá tien dellos nomes sobre la mesa. La FSA-PSOE propón a Francisco González Orejas, mientras que’l PP quier la continuidá d’Antonio Virgili. Nengún de los dos cumple col perfir de persona comprometida colos derechos llingüísticos, como demanda la XDLA. En redes sociales, el coleutivu yá amosó'l so malestar énte les opciones que se manexen.

Un nome que yá quedó descartáu ye’l de José Luis Muñiz Viejo, refugáu pol PP tres ser propuestu en primer llugar polos socialistes. Otra manera, Foro denunció que les negociaciones tán siendo llevaes polos dos partíos con mayor representación na Xunta Xeneral ensin contar col restu.

Estaya educativa

No que se refier al tema educativu, la XDLA apunta que’l plan de dignificación incorpora “reivindicaciones que vienen faciéndose dende bien de tiempu como la Especialidá, el Grau, los proyectos pilotu de vehicularidá, modificaciones curriculares, etc., y que tendríen un efectu positivu na situación tan dramática del idioma nel enseñu”, pero puntualiza que “la negociación col MEC, que na llexislatura pasada nun dio nengún resultáu, ye una manera de nun encarar el tema de la oficialidá” y que “la optatividá de la ufierta de l'asignatura tien que cambiar buscando un mecanismu que favoreza la voluntariedá d'elección”, amás de que “tien que reforzase la supervisión del cumplimientu pola inspección educativa”.

Tamién recuerda que “la situación actual ta llevando a la desapaición de l'asignatura en Secundaria” y puntaliza, no que se refier a los proyeutos d'usu vehicular, que “diez centros son pocos pa dar cobertoria a les esperiencies individuales que se tán faciendo dende va años y que sufren una situación d'allegalidá”. Por último, nesta estaya echa en falta “que se recueya l'usu del asturianu n'otros aspectos del trabayu del profesoráu como nos informes, formación, innovación, investigación...”.

No que se refier a les midíes alministratives del plan de dignificación, la XDLA saluda que “por fin, depués de más de 17 años, se piense n'aspectos como la creación del reglamentu p'aplicar la Llei d'Usu, la culminación del procesu de recuperación toponímica, la estensión del conocimientu del asturianu ente'l personal funcionario, etc.”. Por último, la organización cívica alerta de que “vamos tar sollertes a les acciones del Executivu pa dar cumplimientu a esti mandáu de la Xunta Xeneral y vamos vixilar el cumplimientu de toes estes midíes pa que supongan un camín ensin vuelta hacia'l reconocimientu plenu de los derechos de les persones falantes d'asturianu”.