La XDLA critica “la incapacidá” de la direición de la TPA tres comprobar los datos últimos d’audiencia

Los programes nuevos –toos en castellanu– de la TPA nun cuayen ente l’audiencia. La XDLA critica la incapacidá de la direición del ente públicu de comunicación pa xestionar una programación que da’l llombu a la realidá asturiana.

Pese a la promoción importante fecha pola canal, los dos programes nuevos de les tardes –la serie ‘El Faro’ pasó a les mañanes con un resultáu tovía más probe del que rexistraba–, ‘Medicinatv.com Salud’ y el magacín ‘De hoy no pasa’, que preceden a una recortada y anovada ‘Conexión Asturias’, “tuvieron un 2,5 por cientu na estrena, mentes que la media del día foi del 4 por cientu”, una cifra lloñe tamién de la media mensual de la TPA, que n’avientu foi del 4,7 por cientu. Tampoco nun superó esa cifra’l domingu’l primer capítulu de la serie de documentales ‘Con los pies en la tierra’ (menos del 4 por cientu de cuota de pantalla), producida por CaxAstur, “lo que  tuvo repercusión nel programa n'asturianu que vieno depués: ‘Sones’, que quedó nun 4,9 por cientu, cuando la media ye del 10 por cientu –¡y tovía quedó perriba de la media de TPA de tol día, 4,6 por cientu–”. Al respeuto, ún de los espacios más vistos d’esi domingu foi ‘Territoriu sidreru’, tamién n’asturianu, que tuvo un 7,1 por cientu de share.

Otros programes na llingua del país, como ‘Güelos’ o ‘Camín’, tamién tienen cifres perriba de la media de la TPA pese a nun contar con tanta promoción como ‘El Faro’ o ‘De hoy no pasa’, lo que lleva a la Xunta pola Defensa de la Llingua Asturiana (XDLA) a criticar la política del equipu comandáu por Antonio Virgili. “A pesar de que l’audiencia ta mostrando que quier programes basaos na nuestra identidá cultural y llingüística, TPA anecia nuna programación fecha por productores que vienen de Madrid. Mentanto, mantién a les productores del país con programes de pocu presupuestu, dalgo que nun permite l’afitamientu del nuestru sector audiovisual y la so competitividá a nivel estatal”, apunten dende’l coleutivu cívicu, que considera que con esa política tán llevando “a la cadena a la so desaparición, con un gastu de dineru escomanáu pa una programación que nun tien una respuesta de l’audiencia nin xenera beneficios nel país”. Nesi sen, destaca que “hai que preguntase qué capacidá tienen los xestores del ente pa dirixir la nuestra televisión si les sos decisiones tán faciendo que la sociedá asturiana-y dea'l llombu y que cada vez tenga menos sentíu mantener una televisión con esi modelu de programación”.

Por último, la XDLA afirma que la TPA “namás va tener sentíu y namás va contar col respaldu de la xente si va del llau de la nuestra realidá llingüística y del sector audiovisual asturianu. Ye fundamental que los asturianos vean los medios públicos como un serviciu que forma parte de la so identidá, dalgo fundamental p’asegurar el futuru de la cadena y la so aceptación social. Lo contrario va mostrar que la cadena namás respuende a los intereses políticos y empresariales de dalgunos, amás de dexar clara la incapacidá de la direutiva de RTPA pa xestionar el seviciu públicu audiovisual de tolos asturianos”.