La XDLA convoca unos gallardones lliterarios énte l’ausencia del asturianu nos Premios de la Crítica

La decisión de l’Asociación d’Escritores d’Asturies de retirar la categoría d’asturianu nos XIII Premios de la Crítica lleva a la XDLA a convocar, de manera esceicional, unos gallardones propios. Éstos van tener cuatro categoríes.

L’Hotel Regente d’Uviéu acoyó ayeri la entrega de los premios de l’Asociación d’Escritores d’Asturies que, como se supo nel mes d’abril, eliminaba la categoría d’asturianu que caltenía dende l’añu 2002, decisión que llevó a Carlos Suari, gallardonáu por una obra espublizada nel 2009, a devolver el premiu. El coleutivu d’escritores defende la so decisión pola “falta d’obres en llingua asturiana concurrentes a concursu, lo que pa nós nun ye más qu’una demostración d’inorancia o despreciu al bon facer de los y les escritores porque a lo llargo del 2011 publicáronse 141 obres n’asturianu, númberu bultable qu’echa embaxo cualquier argumentación sobre la escasez de producción lliteraria nel idioma autóctonu”, denuncia la Xunta pola Defensa de la Llingua Asturiana (XDLA).

Otru argumentu utilizáu pa xustificar esti despreciu a la llingua propia del país ye la crisis, dalgo que pal coleutivu cívicu tampoco nun se caltién yá que “les editoriales, instituciones y persones interesaes collaboraben cola asociación de manera que’l costu económicu de les categoríes d’asturianu venía siendo prácticamente inesistente”. “Dende la Xunta pola Defensa de la Llingua Asturiana paeznos que más bien lo qu’hai ye pocu o nengún interés en fomentar la lliteratura n’asturianu dende esta asociación: lo que s’escuende, daveres, ye una actitú prexuiciosa pa col idioma y qu’esti premiu valora más la forma (la llingua) que’l fondu (la calidá lliteraria)”, apunten pa depués aseverar que “nun se pue falar de lliteratura n’Asturies ensin incluir a los y les escritores na llingua propia”.

Énte esta situación, el coleutivu cívicu decidió convocar, de manera esceicional, los Premios Críticos de les Lletres Asturianes, que van reconocer en cuatro categoríes –lliteratura infantil y xuvenil, narrativa, poesía y ensayu– les obres espublizaes a lo llargo del 2011 n’asturianu y gallego-asturiano. Un xuráu compuestu por espertos en caúna d’estes estayes va escoyer a los ganadores, que van recibir el so gallardón nun actu que va tener llugar el vienres 30 de payares na galería d’arte uviedina El Texu (cai El Postigo Baxo 13) a les 19.30 hores.