La XDLA convoca una concentración pal Día de les Lletres Asturianes

La xornada ta marcada pola pandemia de COVID-19, lo que trai cambios con respeuto al formatu emplegáu nes décades últimes.

Una concentración en llugar d'una manifestación. Ye la opción escoyida pola Xunta pola Defensa de la Llingua (XDLA) pa facer la yá tradicional reivindicación d'oficialidá con motivu de la celebración del Día de les Lletres Asturianes.

Habitualmente convocada enantes de la xunta estraordinaria de l'Academia de la Llingua Asturiana nel Campoamor, y treslladáu ésti a la mañana al Edificiu Históricu de la Universidá d'Uviéu en formatu reducíu, l'actu reivindicativu va caltenese pela tarde pa facilitar l'asistencia. En concreto, va ser a les 19 hores na cai Suárez de la Riva, asitiada ente la Xunta Xeneral y Presidencia.

"Anguaño, más que nunca, esti Día de les Lletres Asturianes ha ser un llamamientu a la responsabilidá a los grupos parllamentarios con representación na Xunta Xeneral y al Gobiernu Asturianu p’abrir una reforma del Estatutu d’Autonomía que reconoza al asturianu y al gallego-asturianu como llingües oficiales d’Asturies. El momentu ye agora", demanda la XDLA.