La XDLA convoca a la ciudadanía pa reclamar la oficialidá del asturianu

Esti vienres, Día de les Lletres Asturianes, la Xunta pola Defensa de la Llingua Asturiana (XDLA) entama una manifestación pa reclamar la oficialidá del idioma. La marcha va salir a les 19.30 hores de la Estación del Norte d’Uviéu.
 
Darréu va percorrer les cais d'Uría y San Francisco hasta la plaza de Porlier, frente al Teatru Filarmónica, onde va lleese un discursu p'analizar la situación del asturianu nel últimu añu, esplicaron esti xueves en rueda de prensa los representantes de la XDLA y de Xunta Moza, Carlos Pulgar y Llucía Menéndez Suárez, de manera respeutiva. La organización pretende que la manifestación sía "reivindicativa y festiva" al empar, concretó Menéndez Suárez. Nesta ocasión, va tar amenizada por cortexos de pandereteros y gaites, amás de pola Charanga Feminista. Y too ello con un oxetivu doble: "celebrar el Día de Les Lletres Asturianes y reivindicar la oficialidá de la llingua", recordó Pulgar.
 
El voceru de la XDLA tamién fixo balance del 2011 dende la perspeutiva llingüística y destacó que la situación de paralís política nel país afeutó a les polítiques de promoción de la llingua asturiana. Na so opinión, los recortes presupuestarios tán poniendo "en peligru" la supervivencia de les canales de promoción del asturianu "d'una manera inxustificablemente grave". Estos axustes escúdense, consideró, en "la escusa de la crisis" y resalven los derechos de los falantes d’asturianu.
 
Entrugáu poles declaraciones de la conseyera d'Educación y Universidaes, Ana Isabel Álvarez González, que’l miércoles dixo que los recortes nun afeutaríen a la llingua asturiana, Pulgar dixo que probablemente sía asina porque la situación ye "tan precaria" que "nun hai nada más que recortar" nesti ámbitu. "El pasu siguiente sería que nun hubiera profesores nin asignatura", añadió. Por último, valoró la decisión del Tribunal Supremu d'anular el cupu mínimu d'ocho alumnos qu'estableciera'l Gobiernu pa ufrir l’enseñu d'asturianu na Educación Secundaria Obligatoria (ESO). "Ye una bona noticia" que podría tornar en "un puntu d'inflexón" pa meyorar la situación de la escolarización del asturianu y, por estensión, la normalización d'ésti.