La XDLA censura’l tratamientu en TPA a la manifestación del 16-O al igualala cola actividá d'una entidá “vinculada a la estrema derecha”

“Trátase d'una posición parcial y partidista”, asegura la Xunta pola Defensa de la Llingua Asturiana (XDLA) sobre la “falta de rigor informativu de 'TPA Noticias' al poner al mesmu nivel al movimientu de reivindicación llingüística con una entidá vinculada a la estrema derecha” na segunda edición del informativu del xueves. La entidá instiste na necesidá d’un cambiu na direición del ente públicu.

La noticia en cuestión yera la convocatoria de la manifestación pola oficialidá del asturianu y del gallego-asturiano pal 16 d’ochobre, coincidiendo cola apertura de les negociaciones pa la reforma del Estatutu d’Autonomía. Nesa mesma fila informativa, el parte incorporó tamién la recoyida de firmes n’Uviéu de la Plataforma contra la Cooficialidad, “entidá de la que nun se conoz más actividá que les redes sociales”, apunta la Xunta pola Defensa de la Llingua Asturiana (XDLA) sobre esta organización “vinculada a la estrema derecha”.

“Foron unos 30 segundos dividíos a partes iguales ente la manifestación de la XDLA, entidá que lleva décades enllenando les cais pa reivindicar la oficialidá, y la recoyida de firmes d'esta supuesta asociación, que tien como actividá pública más emblemática una manifestación en Xixón a la qu'acudieron siete persones”, esplica’l coleutivu, que recuerda que “TPA tendría que saber bien la representatividá social de la XDLA, porque les manifestaciones pola oficialidá foron portada nos principales periódicos asturianos y la mesma televisión pública cubrió dalguna de les más multitudinaries con dos equipos informativos”. “La XDLA nin pue nin quier marcar la escaleta de los informativos de la RTPA, pero ponenos al mesmu altor que los actos d'una organización ultraderechista marca mui bien la llinia ideolóxica que ta siguiendo la cadena baxo'l mandu de la dirección actual”, llamenta.

Por esti motivu considera “más urxente que nunca que'l Gobiernu asturianu y los grupos parllamentarios trabayen pa que se produza'l cambiu na dirección de RTPA y asina acompasar la xera de los medios públicos coles demandes de la ciudadanía, nesti casu en términos de derechos llingüísticos”.