La XDLA celebra la so asamblea ordinaria

Nel llocal nuevu del coleutivu cívicu asitiáu nel númberu 15 de la cai Cimavilla d'Uviéu.

Les socies y socios de la Xunta pola Defensa de la Llingua Asturiana (XDLA) tán convocaos esti sábadu a l'asamblea ordinaria de la organización, que va comenzar a les 10.30 hores en primer convocatoria y a les 11 hores, en segunda. Nel orde del día ta afitáu la realización d'un balance xeneral del añu, el tratamientu de cuestiones organizatives, un análisis del documentu de valoración del ‘Proyectu 2018 pola Oficialidá’, la preparación de campañes y un turnu de ruegos y entrugues.

A la finalización de la mesma, va entamase un pinchéu nel llocal y va presentase'l documentu de valoración del ‘Proyectu 2018 pola Oficialidá’ a persones convidaes del mundu políticu y sindical. D'igual forma va dase anuncia de tolos conteníos del XXX Conciertu pola Oficialidá que va tener como sede Xixón el 6 d'ochobre con bandes como Dixebra, Tejedor o La Tarrancha.