La XDLA celebra la entrega de los XXVII Premios Andrés Solar

El salón d’actos del Centru de Cultura Antiguu Institutu celebra esti vienres la entrega de los XXVII Premios Andrés Solar. Los responsables de Bodegas Obanca, autores del vinu Ḷḷumés, van recibir el pegollu. El madreñazu foi pa César Movilla.
 
Según señalen dende la Xunta pola Defensa de la Llingua Asturiana (XDLA), Ḷḷumés, primer vinu de Cangas etiquetáu n’asturianu, ye “un exemplu de normalidá y puesta en valor de les nuestres señes d’identidá”. “La visibilización social del idioma nun sector clave y la recuperación de la toponimia asturiana son dalgunes de les razones poles que se dan esti premiu. Pol so apueste decidíu, ensin complexos, y pol so exemplu de que l’asturianu nun ye un llastre, sinón daqué que xuega al nuestru favor”, espliquen.
 
Mentes, la versión negativa del premiu, el madreñazu, ye esti añu pa César Movilla, alcalde de Noreña, “pola so actitú repetida de rechazu al usu de la llingua asturiana nel ámbitu de la so competencia, vulnerando d’esta manera tanto los derechos de la ciudadanía xeneral como la de los sos llexítimos representantes democráticos”. D’esta forma, Movilla sucede nel gallardón Herminio Sastre, ex conseyeru d’Educación y Ciencia. El ganador del pegollu nel 2010 foi’l programa ‘Camín de Cantares’ de la TPA.
 
L’actu d’entrega de premios va principiar a les 19.30 hores y incopora l’actuación de los músicos folk del occidente del país, Pedru y Tania Pereira. Nel trescursu del eventu va lleese’l discursu de la XDLA nel que se va repasar la situación del asturianu anguañu y a revisar tolo acontecíu nel 2011 referente a la nuesa llingua. Mentes, tres la finalización del eventu, va celebrase una espicha na sidrería Canteli, asitiada na cai Almacenes, con una entrada de 20 euros.