La XDLA anuncia una campaña pa facilitar a la ciudadanía la reclamación del usu del asturianu nes páxines web de les alministraciones públiques

La presencia del asturianu nes páxines webs de los conceyos y otres intituciones públiques, “tamién autonómiques”, ye bien escasa, al igual ques nes redes sociales. Ye por eso que la XDLA va entamar una campaña pa facilitar a la ciudadanía la reclamación a les alministraciones públiques del usu de la llingua asturiana.

“Nestos momentos cuasi puen contase colos deos d'una mano les páxines d'entidaes públiques que cuenten cola opción de poder navegar n'asturianu o en gallego-asturiano, un fechu que consideramos una falta de respetu hacia'l patrimoniu llingüísticu d'esta tierra y hacia los sos falantes”, espresa la organización cívica, que pon l’exemplu d’Avilés. Según esplica nuna nota de prensa, nel portal web nuevu del Teatru Palacio Valdés, que celebra’l so centenu aniversariu esti añu, hai “presencia nula de la llingua asturiana”.

“Esti fechu muestra una falta de sensibilidá del gobiernu local, encabezáu por Mariví Montesín, hacia'l nuestru patrimoniu llingüísticu. L'asturianu tien una presencia namás qu'anecdótica nel día a día de la imaxe pública institucional de la tercer ciudá d'Asturies, como se pue comprobar visitando la web del Conceyu d'Avilés o les sos redes sociales”, apunta la Xunta pola Defensa de la Llingua Asturiana (XDLA). El coleutivu reclama al Conceyu “qu'igüe esta situación y ponga en marcha una versión n'asturianu na web nueva del Palacio Valdés, pero tamién de la mesma páxina del Conceyu y de les sos redes sociales”, pa lo que, recuerda, cuenta con un sertiviciu de normalización llingüística, la Estaya de la Llingua d’Avilés –que sí tien activa una renovada web n’asturianu–, “que bien se podría encargar d'estes cuestiones, como yá lo fai n'otres munches actividaes”.

Esta demanda nel “usu del asturianu nes webs y redes qu'utilicen pa presentase énte la ciudadanía” tamién va pa “los demás conceyos d'Asturies y otres instituciones públiques, tamién autonómiques”. Poro, la XDLA anuncia que va entamar “nos díes vinientes una campaña pa facilitar a los ciudadanos que se puedan dirixir a les Alministraciones públiques pa reclamar l'usu del nuestru idioma nes sos redes sociales y páxines web”.