La XDLA afirma que la manifestación del 21-A amosó’l “clamor social” pa entamar yá cola reforma del Estatutu

Dada la cercanía de la Selmana de les Lletres Asturianes, la Xunta pola Defensa de la Llingua Asturiana (XDLA) solicita a los partíos que presenten nel rexistru de la Xunta Xeneral la propuesta de reforma del artículu 4 del Estatutu pa incluyir la oficialidá. Considera que la manifestación del 21-A amosó’l “clamor social” pa facelo agora.

“Esti vienres 4 de mayu, la Xunta pola Defensa de la Llingua Asturiana convoca la trentena cuarta manifestación del Día de les Lletres Asturianes. Nella va volver recordase que la reclamación de la oficialidá lleva décades ensin resolvese. Yera bon momentu alredor d’eses feches pa qu’esos 12 diputaos presentaren nel rexistru de la Xunta Xeneral la propuesta de reforma del artículu 4”, afalen dende’l coleutivu cívicu. Entienden que na manifestación del sábadu, baxo’l lema ‘L’asturianu llingua oficial ¡agora!’, “demostróse’l clamor social a favor de reconocer oficialmente unos derechos ciudadanos que nun tán reconocíos tovía pa los falantes d’asturianu y gallego-asturiano” y, como se reclamó’l sábadu, “la declaración d'oficialidá tien que ser agora”.

“Tóca-yos a los nuestros representantes políticos facer el so llabor y atender pa les demandes de la xente. El momentu ye agora, nesta llexislatura: non l'añu que vien o d'equí a unos años. Nun ye aceptable éticamente ser conscientes d'una inxusticia y, pudiendo facelo yá, esperar a tiempos electorales meyores pa poner fin a esa inxusticia. La manifestación nun foi pa que se tomara nota del apoyu social a la oficialidá. Foi un encargu a les fuercies polítiques partidaries de dar derechos a los falantes d’asturianu y gallego-asturiano pa que lo faigan yá”, sentencia la XDLA.

Cuatro décades de retrasu

El coleutivu cívicu, que vien trabayando dende l’añu pasáu nel ‘Proyectu 2018 pola Oficialidá’, recuerda que tolos partíos cuenten dende va meses con una propuesta de redaición del estatutu “que-yos propunximos dende la XDLA y qu’ellaboremos coles aportaciones y conseyos d’un grupu de xuristes”, formáu, en concreto, por Leopoldo Tolivar, Gonzalo Olmos, Nicolás Bartolomé, Yolanda Huergo y José Manuel Pérez Fernández. Una vegada aprobada la oficialidá, “más alantre, na llexislatura que vien por exemplu, habrá tiempu p’aprobar una Llei de Normalización Llingüística que desenvuelva, col mayor consensu posible y cola aportación de toles fuercies polítiques, sindicales y sociales, cómo va ser na práctica esa oficialidá: la gradualidá, los ámbitos d’actuación, etc.”, un trabayu “d'años, polo que ye importante ponese a trabayar yá”, encamienta’l grupu cívicu, que recuerda que “llevamos cuatro décades de retrasu”.