La Wikipedia n'asturianu cumplió 15 años

Anguaño raspia los 100.000 artículos.

El 30 de xunetu del 2004 rexistrábase la Wikipedia n'asturianu. Asina, convertíase na númberu 84 de la gran enciclopedia llibre, ún de los proyeutos collaborativos más importantes de la historia y una fonte de conocimientu accesible a millones d'usuarios d'Internet de tol planeta.

Nun sería hasta unos díes depués, el 2 d'agostu cuando se xubiría'l primer artículu, dedicáu al idioma zazaki, faláu n'Anatolia oriental, como amuesa de la vocación universal de la iniciativa asturiana. 15 años más tarde, cuenta con 99.547, conviertiéndose l'asturianu nuna de les llingües minorizaes con mayor presencia en Wikipedia: ocupa'l puestu 63, per delantre del taxik y del letón, y per detrás del galés y del macedoniu.