La Vuelta Femenina, que va tener final en Los Llagos, cumple parcialmente la toponimia oficial

|
Etapa 7 de La Vuelta Femenina 2023 La Pola Siero-Los Llagos

A diferencia que na prueba masculina, onde Unipublic respeta los nomes de llugar tradicionales, nesta competición nueva qu'entama emplega formes derogaes.

La Vuelta Femenina by Carrefour naz esti 2023 dando continuidá a les pruebes femenines venceyaes a La Vuelta, nacíes nel 2015 como una única etapa coincidiendo cola llegada de la carrera a Madrid que foi ampliando la competición hasta los cinco díes de la edición del 2022. Ésta va pasar de setiembre a mayu, ganando entidá propia.

Asturies va tar presente nel calendariu d'esta cita dirixida por Fernando Escartín, ex ciclista del CLAS-Caxastur, como protagonista de la xornada última, la séptima, que va tener llugar el domingu 7 de mayu. El pelotón va salir de La Pola Siero y va tomar direición al este pa finar nun altu emblemáticu del ciclismu mundial, Los Llagos, nun percorríu de 93,7 quilómetros con pasu per Moandi, de segunda categoría.

El llibru de ruta, a diferencia de La Vuelta masculina, que tamién organiza Unipublic, nun respeta completamente la toponimia tradicional, única oficial. Asina refierse a La Pola Siero como 'Pola de Siero', nome yá derogáu, y nun emplega la forma L'Infiestu, única denominación de la capital de conceyu –la parroquia ye Infiesto/L'Infiestu–, y usa 'Infiesto', anque sí emplega Cangues d'Onís cuando l'oficializáu ye'l billingüe Cangues d'Onís/Cangas de Onís.

Quexes públiques

La Xunta pola Defensa de la Llingua Asturiana y Iniciativa pol Asturianu amosaron públicamente la so quexa por esta situación. "Nun pasamos a creyer que tantos años depués, y viendo'l determín que paez que tien el Gobiernu asturianu d'empezar a respetar la llegalidá, resulte tan difícil facer les coses bien en materia de toponimia", espresaron los primeros.

"Reclamamos a la organización de La Vuelta España Femenina l'usu de la toponimia oficial nel pasu de la etapa per Asturies. La Pola Siero, L'Infiestu, Cuadonga..., son los topónimos oficiales que tienen qu'apaecer na información de la competición", rescampló pela so parte'l segundu coleutivu.

Contador Estadistiques