La visita del Papa a Barcelona cuesta más de 600.000 euros

La visita de Benedicto XVI a Barcelona pa la dedicación del templu de la Sagrada Familia tien un presupuestu estimáu ente 500.000 y 600.000 euros, sin contar colos gastos de seguridá y del centru de prensa, al cargu de l'Alministración.

El presupuestu va en función del númberu de silles qu'a lo último s'habilitarán nel esterior del templu y les pantalles xigantes, que disparen la cifra, según esplicó en rueda prensa sobre la visita'l cardenal arzobispu de Barcelona, Lluís Martínez Sistach.
  
Dende l'esterior, prevése que 40.000 persones van siguir sentaes la dedicación del templu al traviés de les pantalles xigantes que se van instalar nel so entornu; la mayoría, fieles de parroquia y families.
  
De momentu, recoyéronse 300.000 euros d'aportaciones de fieles y instituciones privaes, según señaló'l cardenal, que recordó: "aueremos un viaxe austeru, pero dignu", por ser el Papa y pola repercusión "planetaria" del eventu. Calcúlase que la estancia del Papa na ciudá va tener una audiencia mundial de 150 millones de persones.
  
A pagar pola Alministración
“La nuesa actitú ye la de pidir lo mínimo a l'Alministración", indicó Sistach, y agregó: "pero pa nós hai gastos bien difíciles de sufragar como'l centru de prensa, que sobrepasa les nueses posibilidaes, y la seguridá".