La violencia machista causó 22 muertes dende l'añu 2003

Trés muyeres muertes no que va d'añu y 22 dende'l 2003. Estes cifres esmolecientes son les provocaes pola violencia machista n'Asturies, onde hai encarcelaos 152 homes por delitos d'esta mena. El vienres, 25 de payares, celébrase'l Día Internacional de la Eliminación de la Violencia contra la Muyer.

El Gobiernu quixo adelantase ayeri a esta fecha con un actu institucional en Tinéu nel que participaron Guillermo Martínez, conseyeru de Presidencia y Participación Ciudadana; María Jesús Álvarez, conseyera de Desarrollu Rural y Recursos Naturales; y Almudena Cueto, direutora del Institutu Asturianu de la Muyer y Polítiques de Mocedá. “Les cifres rellacionaes cola violencia de xéneru son ciertamente inasumibles. Nun podemos tolerar qu’asesinaren a trés muyeres no que llevamos d’añu n’Asturies y 39 en toda España. Tampoco que 377 precisen dalgún tipu de proteición policial por tar en situación de riesgu de ser atacaes poles sos pareyes o ex pareyes”, afirmó Martínez.

“Toos y caún de nós tenemos la obligación de realizar una aportación proactiva porque, como diz el nuestru lema de campaña institucional p’anguaño, 'Énte la violencia, toos tenemos daqué que dicir'”, añadió Martínez, que destacó la importancia del Pautu Social contra la Violencia sobre les Muyeres del Principáu d’Asturies. Con motivu'l Día Internacional de la Eliminación de la Violencia contra la Muyer, el Gobiernu va poner en marcha'l 2 d’avientu una web al respeuto, anque dellos conteníos yá se tán espublizando al traviés de les redes sociales cola etiqueta, en llingua castellana, #PactoXlasMujeres.

Les cifres

El teléfonu gratuitu 016, d’información y asesoramientu, recibió 121 llamaes procedentes d'Asturies en setiembre, con una media de cuatro al día. Anguaño hai diez maltratadores con dispositivos electrónicos de vixilancia y permanecen abiertos 1.145 casos, esto ye, con siguimientu o vixilancia policial. D’ellos, en 768 nun hai riesgu apreciáu, anque se caltién un siguimientu y se revisen cada trés meses pa que-yos apliquen, si ye necesario, proteición.

Mentes, n’otros 377, les muyeres disponen d’esa proteición policial. Amás, na prisión de Villabona hai 152 internos por delitos d’estes carauterístiques.

Otra manera, nel primer semestre contabilizáronse nel país 1.319 denuncies por malos tratos, de les que 309 motivaron órdenes de proteición. Nel mesmu periodu rexistráronse 356 ingresos de persones –181 muyeres y 175 menores al so cargu– na rede nacional de cases d’acoyida.