La VII Primer Sidre l'Añu fai del Pueblu d'Asturies una gran espicha

Los trabayadores de Gijón Fabril van inaugurar el xueves l'eventu sidreru de la Selmana Santa asturiana.

Un añu más l'eventu entamáu pola revista La Sidra y la Fundación Asturies XXI torna nestes feches festives col oxetivu de recuperar la tradición de les espiches de Selmana Santa y el consumu de sidre nuevo, ensin trasegar. Asina, los asistentes van poder prebar, dende'l xueves hasta'l domingu nel tendayu del Muséu del Pueblu d'Asturies, la producción de más de 70 llagares, no que ye la mayor espicha al aire llibre del país.

De 12 a 22 hores va permanecer abiertu'l Muséu de Pueblu d'Asturies estes cuatro xornaes, cola esceición única del domingu, cuando va pesllar l'actividá a les 17 hores. Nesti tiempu, y tres pagar 5 euros –el vasu de crista ha de mercase aparte–, tolos asistentes van tener la oportunidá de prebar la sidra de tolos llagares participantes, asina como sidra ensin alcohol o sidra dulce.

D'igual forma, la organización tien preparada cantidá d'actividaes, tanto pa neños como mayores, p'amenizar les xornaes. Asina, los primeros van poder mayar mazana pa que puedan esperimentar de primer mano ún de los pasos esenciales pa la ellaboración de sidre o asistir a un taller de decoración de galletes, corchar sidre a mazu, participar en xuegos comu la xaronca, la llave o'l tiru de boína y inclusive concursar nun certame de echadores.

Mentes, los adultos van disfrutar del concursu de sidre casero fecho en madera; de cocina en vivu y armonizaxe con sidre; música y bailles del país; una amuesa d'artesanía asturiano en direuto; deportes tradicionales; exhibiciones; y clases d'echáu. A estes actividaes hai que sumar el yá tradicional 'Asturianada y sidre', el vienres y sábadu dende les 16 hores, con una importante presencia infantil.

Vargas va echar el culín inaugural

La inauguración de la VII Primer Sidre l'Añu va tener llugar mañana, a les 13 hores, cola participación de los trabayadores de Gijón Fabril, en llucha contra'l zarru de la empresa que pretende la propiedá. L'encargáu d'echar el culín inaugural va ser Jorge Vargas, ganador del Campeonatu d'Asturies d'Echadores de Sidra 2015.