La versión 11.04 d’Ubuntu, considerada la más novedosa, yá ta disponible

Los usuarios tienen dende esti xueves a la so disposición la versión 11.04 d’Ubuntu. El sábadu, na FNAC, va celebrase una presentación del sistema operativu y les persones que lleven el so ordenador van poder instalalu de baldre.
 
Ubuntu, sistema operativu que tar tornáu dafechu al asturianu, tien disponible dende güei la so versión 11.04, que toles persones que quieran van poder instalar con ayuda d’espertos el sábadu nel FNAC de Parque Principado. Va ser nel ‘Presentación & Install Party d’Ubuntu 11.04’ qu’entama Softastur, AsturLiNUX, MouseTrap y Ubuntu-ast, col patrociniu de la revista Ubuntu-user.
 
L’actividá va principiar a les 11 hores y va allargase hasta les 20.30 hores. Cada hora, los espertos d’estos coleutivos van enseñar qué ye Ubuntu y el software, y les novedaes principales de la versión de 11.04. Amás, de 11 a 14 hores y de 16 a 20.30 hores, va celebrase’l taller d’instalación d’Ubuntu. Pa ello, enantes deben cumplir unos pasos bien cenciellos pa poner a puntu l’ordenador p’amestar un sistema operativu nuevu: tener espaciu llibre nel discu duru –un mínimu de 8 GB–, revisar fallos nel discu duru, desfragmentalu y facer una copia de seguridá. Amás, de les 14 a les 16 hores va celebrase una folixa nel merenderu asitiáu tres l’Ikea nel que los coleutivos qu’entamen l’actividá ponen la bébora y los asistentes comida pa compartir ente toos.
 
Esta versión d’Ubuntu destaca pola esperiencia única qu’ufre Unity, l’entornu d’escritoriu nuevu de Canonical. Una innovación que los asistentes al ‘Presentación & Install Party d’Ubuntu 11.04’ van poder conocer de primer mano.