La Vagamar principia’l llunes cola tradicional arribada de congresistes

Carlos Rubiera y Xosé Nel Riesgo participaron, xunto con Humberto Gonzali, na presentación oficial de la sétima edición de la Vagamar. Ésta va principiar el llunes cola arribada de congresistes y va allargase hasta’l sábadu.

La sala de conferencies del Centru de Cultura Antiguu Institutu, sede de toles actividaes de la Vagamar 2012, foi’l llugar escoyíu pa dar a conocer a los medios el programa d’esti añu. El primeru n’intervenir foi’l conceyal d’Educación, Cultura, Mocedá y Festexos, Carlos Rubiera, qu’eloxó’l trabayu que lleva desendolcando l’Asociación Cultural L’Arribada “con rigor y con ésitu nel ámbitu de la cultura asturiana” dende va años. Tamién destacó la collaboración que mantién esti coleutivu col Conceyu de Xixón, como asocedió nel Festival Arcu Atlánticu, y la so capacidá pa trabayar con “presupuestos mui modestos”.

El direutor de la Fundación Municipal de Cultura, Educación y Universidá Popular, Xosé Nel Riesgo, tamién tuvo bones pallabres pa l’Asociación Cultural L’Arribada, coleutivu que, na so opinión, foi quien a valtar la división esistente hai alredor d’una década na lliteratura asturiana, tanto en llingua asturiana como en castellana. “Naquel momento, Humberto y yo, en compañía d’otres persones, llegamos a la conclusión de que lo que yera realmente necesario yera poner en marcha un alcuentru lliterariu plural, abiertu absolutamente a toles tendencies, sensibilidaes, étiques, estétiques, ideoloxíes y lo que fora necesariu. Esto ye, ensin nengún tipu de discriminación por nengún motivu. Esti alcuentru plural foi L’Arribada”, señaló Riesgo, que darréu llamentó que se convirtiera “en práuticamente l’únicu eventu cultural qu’hai n’Asturies nel que se pue asistir durante unos díes a la presentación de decenes de publicaciones”.

Pela so parte, el coordinador de les actividaes de L’Arribada, Humberto Gonzali, dedicóse a enumerar les actividaes de la Vagamar 2012, que va principiar el llunes, a les 18 hores, cola arribada de congresistes al Puertu Deportivu de Xixón nel barcu ‘Cimavilla I’, pa depués dirixise al Antiguu Institutu nun pasucais xunto a la Banda de Gaites de Castrillón. Un homenaxe a la narrativa en llingua asturiana y gallego-asturiano, una amuesa d’arreglos ikebana de l’armenia Marina Mikayelyan, una ponencia sobre el papel de la muyer nel teatru y una mesa redonda sobre la lliteratura asturiana en femenín, otra sobre el ‘hard-boiled’ en llingua asturiana y la entrega de los Premios Timón 2012 a los escritores Antón García y Fernando Menéndez, amás de delles presentaciones de llibros, son dalgunes de les actividaes principales d’esta edición de la Vagamar.

Gonzali anunció tamién qu’enantes de final d’añu L’Arribada va entamar un actu en Castrillón y otru nel occidente del país, y que ta trabayando na organización d’un par de xornaes al mes, a partir d’ochobre, “dedicaes en cada ocasión a una editorial asturiana distinta onde vamos a tratar que nos presente un balance del so proyeutu”. Tamién va haber un contautu ente los llectores y dalgunos de los escritores qu’espublicen neses editoriales.

Na semeya, Riesgo, Rubiera y Gonzali.