La vacunación evitó la muerte de 400 asturianos en residencies, asegura l'Observatoriu de la Salú

El miércoles rexistráronse 64 contaxos.

L'últimu 'Informe sobre mortalidá con coronavirus n'Asturies' del Observatoriu de Salú n'Asturies (OBSA) constata que la vacunación evitó 400 muertes por COVID-19 nos centros sociosanitarios dende l'entamu de la campaña'l 27 d'avientu. Esta afirmación vien de "comparar los finaos en domicilio fuera de residencia y los de residencia, y asumiendo les diferencies entrambes dende la fecha del entamu de la vacunación que se fixo de manera especial en residencies cola pauta completa de vacunación".

"Nes selmanes últimes yá entamó a notar l'efeutu de la vacunación en términos de mortalidá nos grupos d'edá nes que s'empezó cola aplicación de la vacuna, pero los sos efeutos son muncho más complexos d'analizar, nesti casu", añade'l documentu. L'OBSA afita la cifra total de finaos con COVID-19 n'Asturies en 2.429 al tener en cuenta criterios diferentes a les del Ministeriu de Sanidá, que rexistra mediu millar menos, 1.956, al contabiilizar namái a aquellos que tuvieren una PCR positiva.

Dos perdes ayeri

A falta de la confirmación de los datos oficiales de la COVID-19, la Conseyería de Salú comunicó 64 casos nuevos ayeri –l'actualización resta 6 por duplicaos en día anteriores–. Son 19 más que'l martes.

Fixéronse 2.537 pruebes de diagnósticu d'infeición activa, polo que la tasa de positividá s'asitió nel 2,72, por cientu, superior tamién a la xornada anterior, cuando foi del 2,03 por cientu. A 7 díes esti porcentaxe, enantes de l'actualización, taba nun 2,78 por cientu –ayeri xubió al 2,79 por cientu–.

Hai 91 pacientes hospitalizaos en planta con confirmación o sospecha de COVID-19, a los qu'hai que sumar 37 que tán na UCI, 3 y 2 menos que'l martes, de manera respeutiva. Dos homes, de 78 y 75 años, finaron cola cola enfermedá causada pol coronavirus SARS-CoV-2.

19 biltos activos

Asturies informó al Ministeriu de Sanidá de la esistencia de 19 biltos activos, 22 menos qu'hai dos selmanes, con un total de 198 casos. 3 d'ellos detectáronse estos 7 díes últimos, comunica la conseyería.

Na imaxe, Eulalia Josefa Paleo 'Pepita', la primera persona a la que se-y alministró la vacuna n'Asturies, recibe la segunda dosis na Mesta de Pumarín. Semeya obra de POOL/ EuropaPress/ Jorge Peteiro.