La vacunación ensin cita aporta a los campus de la Universidá d'Uviéu

Esti xueves rexistráronse 17 casos nuevos.

El Serviciu de Salú del Principáu d'Asturies (SESPA) y la Universidá d'Uviéu tán celebrando la primer xornada de vacunación contra'l coronavirus SARS-CoV-2 ensin cita previa p'aumentar el grau d'inmunización de personal y alumnáu de la institución. A ello súmase'l segundu 'VACFriday', n'ocho puntos del país, depués d'alministrar el preparáu la selmana pasada a 885 persones.

Tán güei llamaos a participar nesta iniciativa nueva los estudiantes y personal de la Escuela d'Inxeniería de Mines, Enerxía y Materiales, y de la Facultá de Psicoloxía, asina como los trabayadores de los servicios centrales, col dispositivu asitiáu nel llateral del Teatru Campoamor. El llunes el centru móvil de vacunación va tar nel campus de Xixón, pa dir el martes a Mieres.

El miércoles va tornar a Uviéu pa instalase en Llamaquique, movese a El Cristo'l xueves y el vienres a El Milán. Pa recibir la vacuna namái hai que presentar el DNI.

Ensin finaos

A falta de la espublización oficial de los datos de la COVID-19, la Conseyería de Salú comunicó la detección ayeri de 17 casos nuevos –l'actualización suma 1 más non contabilizáu en díes anteriores–. Son 8 más que'l miércoles, cuando s'informó de 9.

Fixéronse 1.990 pruebes de diagnósticu d'infeición activa, polo que la tasa de positividá s'asitió nel 1,36 por cientu. A 7 díes esti porcentaxe yera enantes de l'actualización del 1,67 por cientu –ayeri baxó al 1,51 por cientu–.

Nun hebo que llamentar muertes ayeri, calteníendose'l total de finaos en 2.065. Tán hospitalizaos con confirmación o sospecha de COVID-19 32 persones, 2 más que'l miércoles, a los qu'hai que sumar otros 11 ingresaos na UCI, 1 menos.

Na imaxe, campaña del Gobiernu 'Vacúnate ho!!/Vacúnate ne!!'.