La Universidá entama’l cursu en que celebra los sos 400 años

La Universidá d'Uviéu celebra güei un actu solemne cola presencia de 35 rectores de diferentes universidaes españoles, la ministra d'Educación, Mercedes Cabrera y los Reis d'España. La ceremonia va entamar a les 12.00 hores nel edificiu históricu de la máxima institución académica, fundada baxo la idea del arzobispu y inquisidor Fernando Valdés de Salas, que punxo por escrito nel so testamentu'l proyectu d'Universidá, qu'entamó ufiertando estudios d'artes, cánones, lleis y teoloxía.

Incluyendo rectores y académicos, la cifra de convidaos al actu solemne de güei ye de 460, y anque la intención ye facelu en patiu del edificiu históricu, casu de llover treslladaríase a la Biblioteca Histórica de la Universidá, anque'l rector Juan Vázquez quier más el patiu, pola so mayor superficie y también pola so intención de "recrear l'ambiente del actu del tercer centenariu de la Universidá", en 1907, que también se fexo n'esti mesmu escenariu. L'actu académicu va contar coles intervenciones de la secretaria xeneral de la Universidá, Margarita Fuente Noriega, pa lleer la memorai del cursu académicu. Dempués va ser el turnu pa la llección inaugural, a cargu del profesor Manuel Álvarez Uría, y tres d'elli van tomar la pallabra'l rector, la ministra d'Educación, el presidente del Principáu y el Rei d'España.