La Universidá d'Uviéu celebra l'Añu Canella

Conciertos, meses redondes, conferencies, llectures de testos y una esposición d'homenaxe final al rector prográmense pa estos meses.

Fermín Canella y Secades, xurista y escritor, nació'l 7 de xunetu del 1849 n'Uviéu y finó el 22 de marzu de 1924, tamién n'Uviéu. Siempre venceyáu a la Universidá d'Uviéu, la institución honra al rector Canella dedicando l'añu 2024 a la so figura pa conmemorar asina'l centenariu del so fallecimientu.

Ignacio Villaverde, rector actual, rescampló esta mañana que l'Añu Canella ye un actu de xusticia pa con una persona que permaneció siempre estrechamente xuníu a la Universidá d'Uviéu. Villaverde recordó que Canella pasó per tolos estamentos universitarios hasta consiguir la máxima distinción.

Estudió Filosofía y Lletres y Derechu, doctoróse en Derechu Civil y Canónicu, y empezó la so carrera docente como auxiliar na Facultá de Derechu, na que llogró la cátedra nel 1876. Foi vicerrector ente'l 1882 y el 1884, y rector ente'l 1906 y el 1914, cargu que tuvo que dexar pa convertise en senador.

Villaverde sorrayó que, sicasí, Canella nunca se deslligó de la institución. De fechu, llueu de la so xubilación nel 1919, foi nomáu rector honorariu de la Universidá d'Uviéu.

Dos conciertos esti mes

María Pilar García Cuetos, vicerrectora d'Estensión Universitaria y Proyeición Cultural, esbilló dalgunos de los puntos más destacaos de la programación del Añu Canella, qu'inda nun ta pesllada na so totalidá. Los actos pa conmemorar el centenariu del so fallecimientu empiecen este mesmu mes con dos conciertos n'homenaxe interpretaos pola mezzosoprano Lola Casariego, acompañada pol pianista Julio César Picos: el miércoles, 20 de marzu, a les 19 hores nel Paraninfu del Edificiu Históricu, y al día siguiente a les 18 hores nel Pozu Sotón.

Entrambes citen formen parte de la segunda edición del ciclu 'musicUO', que pretende retomar los festivales de música que foron emblema de la Universidá d'Uviéu nel sieglu pasáu. El restu d'actividaes confirmaes son les siguientes:

• Marzu: conferencia'l día 21 sobre la figura del rector a cargu de Julio Carbajo, profesor del Departamentu de Derechu Priváu y de la Empresa, na Aula Magna del Edificiu Históricu.
• Abril: mesa redonda 'Del asturianu de Canella al de güei', na que se va reflexonar sobre l'aportación del rector a la valorización y recuperación de la llingua asturiana y l'evolución d'esi procesu hasta l'actualidá.
• Mayu: mesa redonda 'Fermín Canella y la renovación pedagógica' cola participación de les profesores del Departamentu de Ciencies de la Educación, Carmen Diego Pérez y Aida Tarrón.
• Setiembre: actu 'Dando voz a Fermín Canella', una lectura de testos sobre temes diversos abordaos pol rector Canella nes sos espublizaciones a cargu de personal docente y investigador de la Universidá d'Uviéu.
• Ochobre: conferencia 'Fermín Canella y las bibliotecas universitarias' a cargu de Ramón Rodríguez Álvarez, direutor del Real Instituto de Estudios Asturianos (RIDEA) y ex direutor de la Biblioteca de la Universidá d'Uviéu, na Aula Magna del Edificiu Históricu.
• Payares: esposición dedicada a abordar la biografía del rector y la so actividá como universitariu y compromisu cola reforma de la institución, con datos inéditos estrayíos del so archivu personal y fotografíes, que se va acompañar de la edición d'un catálogu.

Asturianista y incadigable investigador y divulgador

Canella perteneció a una xeneración de pernomaos universitarios y tuvo como compañeros de claustru a personalidaes como Leopoldo Alas Clarín, Rafael Altamira, Melquiades Álvarez y Adolfo Posada, ente otros. La so trayeutoria académica ta marcada por reconocencies como'l de ser nomáu correspondiente de la Real Academia Española, cronista oficial d'Uviéu y d'Asturies, o senador.

Asturianista y incadigable investigador y divulgador de la historia, la cultura, les tradiciones y el folclor d'Asturies, ente les sos contribuciones más destacaes hai que citar el so llabor como impulsor del Muséu Arqueolóxicu d'Uviéu o l'asociación asturianista La Quintana, asina como la direición de la espublización de trés volúmenes de gran formatu y abondamente ilustraos sobre Asturies.

Del so llegáu como escritor ye importante rescamplar 'Historia de la Universidad de Oviedo y noticias de los establecimientos de enseñanza de su distrito' (1873), 'Estudios asturianos: (Cartafueyos d'Asturies)' (1886), 'El libro de Oviedo: guía de la ciudad y su Concejo' (1887), 'Historia de Llanes y su Concejo (1896)', 'Memorias asturianas del año ocho' (1908) y 'De Covadonga: (contribución al XII Centenario)' (1918).